Ses sterf in Bosbokrand ongeluk 

Ses mense is Saterdagaand dood nadat ʼn ligte afleweringsvoertuig en nog ʼn voertuig reg van voor op die R40 by Violent Bank in Bosbokrand in ʼn botsing betrokke was. 

DIE ONGELUK HET SATERDAGAAN PLAASGEVIND OP DIE R40

Volgens woordvoerder van die departement van gemeenskapsveiligheid, Moeti Mmusi, sê die ongeluk het omstreeks 19:30 plaasgevind. 

“Vier van die oorledenes was insittendes in die voertuig, terwyl die vyfde slagoffer ʼn passasier in die ligte afleweringsvoertuig was.” 

DIE VOERTUIG HET GLO EERS ‘N VOETGANGER GETREF

Mmusi sê daar word beweer dat die voertuig eers ʼn voetganger getref het; die voetganger het onderweg na ʼn nabygeleë hospitaal aan sy beserings beswyk.

Vyf van die slagoffers is op die toneel dood. 

“Die bestuurder van die ligte afleweringsvoertuig het blykbaar beheer verloor ná die botsing en ook in ʼn minibustaxi vasgery.”

VERSKEIE PASSASIERS HET BESERINGS OPGEDOEN

Die bestuurder is kritiek beseer. Verskeie passasiers in die minibustaxi het ook beserings opgedoen. 

Hy sê daar is met al die beseerdes na die nabygeleë hospitaal in die omgewing gehaas.

ʼn Ondersoek na die ongeluk is reeds aan die gang. 

‘N BEROEP IS GEDOEN OP MOTORISTE OM TEN ALLE TYE VERSIGTIG TE WEES

Die waarnemende LUR vir gemeenskapsveiligheid, sekuriteit en skakeling in Mpumalanga, Busisiwe Shiba, sê hierdie ongelukke is betreurenswaardig en veroorsaak soveel ellende vir baie gesinne. 

Sy het ʼn beroep op motoriste gedoen om te alle tye versigtig te wees wanneer hulle die pad gebruik om die getal noodlottige ongelukke te verminder.

“Ons is platgeslaan oor die getal noodlottige ongelukke wat gereeld op die pad plaasvind. Motoriste moet ons help om onnodige lewensverlies te voorkom deur die reëls te gehoorsaam en versigtig te wees. Padveiligheid is almal se verantwoordelikheid, en ons moet almal ons deel doen,”

sê sy.

LEES OOK: Bejaarde man dood weke ná honde aanval