Ramaphosa betreur onlangse mortieraanval in DRK

Pres. Cyril Ramaphosa het Donderdag gesê hy betreur die onlangse mortieraanval in die ooste van die Demokratiese Republiek die Kongo (DRK).

DIE TWEE SANDF SOLDATE IS VROEëR DIE WEEK DOOD

Dié aanval het vroeër vandeesweek die lewe van twee Suid-Afrikaanse soldate geëis en verskeie ander is beseer.

Ramaphosa het die troepe se naasbestaandes en die beseerde soldate daarvan verseker dat die weermag die nodige logistieke en psigososiale ondersteuning aan hulle sal verskaf.

RAMAPHOSA Sê ONDERSTEUNING SAL AAN HULLE NAASBESTAANDES VERSKAF WORD

“Terwyl ons treur oor die sterftes en die beserings wat ons soldate opgedoen het, waardeer ons en voel ons nederig oor die opofferings wat hulle gemaak het ter wille van vrede en stabiliteit in ons streek, en hulle sal nie vergeet word nie,” het Ramaphosa gesê.

ʼn Mortieraanval het Dinsdag die lewe van twee Suid-Afrikaanse soldate geëis.

DIE MORTIERAANVAL HET DINSDAG PLAASGEVIND

Siphiwe Dlamini, woordvoerder van die weermag sê nog 20 ander soldate is beseer.

Volgens Dlamini is vier lede kritiek beseer en in ʼn hospitaal opgeneem.

Lees ook: Polisiebeampte vas vir die verkragting van ‘n ses-jarige seuntjie

“Die ander lede wat minder ernstige beserings opgedoen het, sal na verwagting binnekort ontslaan word,” sê Dlamini.

DIE FAMILIE VAN DIE SOLDATE IS IN KENNIS GESTEL

Hy het bygevoeg dat die familielede van die gesneuwelde soldate reeds van hul dood in kennis gestel is, maar dat hul name nog nie bekend gemaak is nie.

Die sterftes volg kort op die dood van sers. Mbulelo David Ngubane vroeër vanjaar.

Dit kom na gevegte tussen die M23-rebelle en Suid-Afrikaanse soldate uitgebreek het.

SUID-AFRIKA HET TANS DUISENDE SOLDATE IN DIE GEBIED

Suid-Afrika het byna 1 200 soldate na die gebied gestuur ter nakoming van die Verenigde Nasies (VN) se stabiliseringsending, bekend as Monusco.

Lees ook: Twee SA soldate in mortieraanval in DRK dood