Tuberkulose toetsvereistes vir Suid-Afrikaners wat aansoek doen vir Britse Visums

Suid-Afrika is een van die lande wie se burgers verplig is om getoets te word vir tuberkulose (TB) wanneer hulle aansoek doen vir Britse visums langer as ses maande. Die vereiste geld egter ook vir enigeen wat in Suid-Afrika gewoon het vir die laaste ses maande.

Breytenbachs het ‘n kort gids opgestel om Suid-Afrikaners leiding te gee in die verband.

Vrystelling van Tuberkulose Toetsvereistes

Dit is nie nodig om ‘n TB-sertifikaat in te dien saam met alle Britse visum aansoeke nie. (Jou Breytenbachs konsultant sal kan bevestig of jy wel ‘n sertikaat moet kry).

Alle tipes besoeker visums is vrygestel. Selfs as jy aansoek doen vir die langtermyn-besoekervisakategorie, sal jou verblyf minder as ses maande op ‘n slag wees. Besoekervisum-aansoekers hoef dus nie ‘n TB-sertifikaat in te dien saam met hulle visum aansoek nie.

Ander vrystellinge sluit in;

• Diplomatieke paspoorthouers
• Terugkerende inwoners, of die sogenaamde “returning residents’ wat vir korter as twee jaar weg was uit die VK.

Waar kan ek gaan vir ‘n TB toets?

Dit is baie belangrik dat mense daarop let dat die kliniek wat jy besoek ‘n goedgekeurde kliniek moet wees. ‘n Persoon kan nie gaan vir ‘n toets by enige dokter of hospitaal nie. Die Britse Home Office het ‘n lys van goedgekeurde klinieke, en sal slegs TB-sertifikate aanvaar van goedgekeurde klinieke.

In Suid-Afrika is daar goedgekeurde klinieke in Pretoria, Kaapstad en Durban.

Ongelukkig is daar nie klinieke in van ons buurlande nie, en inwoners van die buurlande moet ‘n afspraak maak in ‘n land waar daar wel goedgekeurde klinieke is. As jy dus van Lesotho of Swaziland is, sal jy ‘n afspraak moet bywoon by een van die toetsentrums in Suid-Afrika.

Dit is ook belangrik om daarop te let dat jy nie net kan opdaag by ‘n goedgekeurde kliniek nie. Jy moet vooraf ‘n afspraak en betaling maak. Breytenbachs beveel ook aan dat jy duidelik noem dat jy ‘n afspraak maak vir ‘n TB sertifikaat vir ‘n Britse visum.

LEES OOK: Waarom emigreer talle Suid-Afrikaners na Isle of Man?

Kostes van die Tuberkulose Toetse

Die koste van die TB-toets in Suid-Afrika is tans R3,000 vir persone ouer as 11 jaar, en R1 500 vir persone jonger as 11 jaar.

Die toetsfooi is nie terugbetaalbaar as ‘n persoon positief toets, of besluit om nie meer na die VK te reis, of as die VK-visum geweier word nie.

Wat die Tuberkulose-toets behels

Die kliniek sal ‘n long X-straal neem om vir tuberkulose te kontroleer. In sommige gevalle mag hulle ook ‘n spoegmonster vereis, as die X-straal nie duidelik is nie.  

Indien jy positief toets vir TB, sal jy natuurlik nie ‘n sertifikaat kry nie, en jy sal nie kan aansoek doen vir jou Britse visum, alvorens jy negatief toets nie.

As die toetse toon dat jy geen TB het nie, sal jy ‘n TB-sertifikaat kry wat jy kan indien saam met jou Britse visum aansoek. Die sertifikaat is vir ses maande geldig.

Moet kinders ook ‘n TB toets doen?

Kinders moet die afspraak by die kliniek bywoon. Die kliniek sal besluit of ‘n X-straal geneem word of nie. Normaalweg hoef kinders onder 11 jaar nie ‘n bors X-straal te neem nie, en sal daar slegs van die ouers verwag word om ‘n gesondheidsvraelys te voltooi.

Die kliniek sal dan besluit of jou kind TB-vry is en jou ‘n sertifikaat gee.

Swanger Vrouens

Swanger vroue het ‘n keuse of hulle ‘n spoeg toets wil doen of ‘n X-straal wil neem met ‘n ekstra skild, wat die moeder en ongebore kind te beskerm.  

Hoe Breytenbachs jou kan help

Breytenbachs help reeds sedert 1998 ons landgenote met hulle immigrasie behoeftes. Vir die beste kans op ‘n suksesvolle Britse visum aansoek, kontak ons gerus!

Besoek ons webblad by  https://www.bic-immigration.com of epos ons by info@bic-immigration.com

LEES OOK: Wat is die verwagte veranderinge aan die Britse Immigrasie Reëls?