Pick n Pay doen aansoek om winkels wat Baladakis-groep besit te likwideer

Pick n Pay het Woensdag ‘n hofaansoek ingedien vir die likwidasie van die Pick n Pay-franchise-ondernemings wat deur die Baladakis-groep besit word, ná die konsessiehouers se voortgesette opbou van agterstallige skuld, wat R224 miljoen beloop het.

Pick n Pay het in ‘n verklaring gesê hulle verwag dat die likwidasie-aansoek omstreeks Dinsdag, 12 Maart in die Johannesburgse hooggeregshof aangehoor sal word.

Die Johannesburgse hooggeregshof het verlede week in die guns van Pick n Pay beslis in ‘n dringende aansoek teen die Baladakis-groep franchisenemers om sy sekuriteit oor hul 10 supermarkte en nege drankwinkels te vervolmaak.

Die Baladakis-groep het onmiddellik aansoek gedoen om verlof om teen die bevel te appelleer, wat Woensdagoggend in die hooggeregshof aangehoor is.

Die regter het Woensdagmiddag die aansoek om verlof tot appèl met koste van die hand gewys.

Sean Summers, uitvoerende hoof van Pick n Pay, het gesê: “Ons het alles moontlik oor ‘n uitgerekte tydperk gedoen om te voorkom dat ons sulke drastiese stappe teen hierdie franchisegroep hoef te neem. Op ‘n persoonlike vlak is dit diep teleurstellend aangesien ek die familie al sowat 30 jaar ken en nie hierdie besluit sonder behoorlike oorweging geneem het nie.

“Maar die waarheid van die saak is dat die ernstige finansiële situasie waarin die Baladakis hulle bevind ‘n werklikheid is. Ons het baie ander franchisenemergroepe – sommige selfs groter – en individuele franchisenemers wat winsgewende en volhoubare besighede bedryf.

“In goeie trou, in ooreenstemming met ons kontraktuele verpligtinge, het ons voortgegaan om hulle daagliks van voorraad te voorsien, en hulle het alle betalings in die laaste week gestaak. Ons aanspreeklikheid groei steeds. Ons het ‘n plig om in die beste belang van alle partye op te tree, insluitend al ons franchisenemers en die Pick n Pay-groep om kontinuïteit en respek te handhaaf vir die ooreenkomste wat ons in plek het.

“Dit is die eerste keer in ons geskiedenis dat ons aansoek gedoen het om ‘n franchise-onderneming te likwideer, maar ons sit eenvoudig met geen ander opsies nie, aangesien die Baladakis-groep dit duidelik gemaak het dat hulle sal voortgaan om die proses te frustreer deur voort te gaan om teen die uitsprake te appelleer wat teen hulle gevind is, en daardeur word Pick n Pay blootgestel aan ‘n steeds toenemende skuld waarvoor hulle tans geen betaling maak nie. Ons sal altyd behoorlike regsproses volg en dit was nooit ons bedoeling om hierdie in die publieke domein te hanteer nie. Die feite sal mettertyd duidelik word – ons het niks om weg te steek nie.

“Ons het ‘n uitsonderlike familie van franchisenemers wat winsgewend, lojaal, hardwerkend en ‘n eer vir die groep is. Ons glo ons het alles in ons vermoë gedoen om hierdie optrede met die Baladakis-groep te probeer vermy, maar ons is nou aan die einde van die pad.”

LEES: Uitgebreide Openbare Werke Program skep miljoene werksgeleenthede