Versekering wat elke huiseienaar in SA moet hê

Inbrake is iets waaronder Suid-Afrikaners te gereëld deurloop, met rofweg 3 014 hushoudings wat daagliks geteiken word. Suid-Afrika se enigste trots-Afrikaanse versekeringsproduk, Virseker het onlangs jare se inbraakdata geanaliseer om te identifiseer watter items hoog op misdadigers se inkopielys is, watter toegangspunte hulle die gereëldste gebruik, en ook ‘n handige lys saamgestel van die lyne van verdediging wat elke SA huishouding behoort te hê.

Volgens Stats SA, is huisbraak die mees algemene misdaad wat Suid-Afrikaanse huishoudings raak, met ‘n totaal van 1,1 miljoen  huishoudings wat tussen 2022 en 2023 deurgeloop het.

“Nes baie eerlike Suid-Afrikaners ervaar misdadigers ook die uitdagings van stygende lewenskostes en gryp hulle na elke geleentheid om ‘n oneerlike rand of twee te maak,” sê Johanni Jennings, Hoof van Virseker. “Hulle is van nature opportunisties, so wonings wat nie deeglik beveilig is nie is top teikens vir inbrekers. Suid-Afrikaners is dit aan hulself verskuldig om ‘n deeglike sekuriteitsoudit te doen en hulself be beskerm sover hul vermoëns dit toelaat.”

Die volgende tendense staan uit in Virseker se eisdata:

• Die top 10 items wat gesteel word: TVs, klankstelsels, rekenaars en skootrekenaars, selfone en tabletrekenaars, juwele, kraggereedskap, tuingereedskap, speletjieskonsoles, fietse en beddegoed.
• 77% van inbrake maak buit van huisinhoud en 23% van buitegebou-inhoud.
• Toegang word meestal verkry deur vensters, gevolg deur motorhuise, deure, skuifdeure en, in rare gevalle, dakke.

Virseker lig die volgende opsies uit om jou huis beter te beveilig:

• ‘n Stewige grensmuur of palisadeheining wat nie alleen privaatheid bied nie, maar ook as eerste lyn van verdediging dien.
• Goeie hekke en motorhuisdeure wat sterk is en ideaal met afstandbeheer oopgemaak kan word. Dis belangrik dat hierdie hekke en deure vinnig oop en toe gemaak kan word om die geleentheidsvenster vir misdadigers so klein as moontlik te hou. Maak ook seker dat hekke nie van hul spore gelig kan word nie en dat hekmotors veilig versteek is en nie maklik toeganklik is nie.
• ‘n Elektriese heining wat ‘n ekstra sekuriteitslaag bied en ook as afskrikmiddel dien. Dis belangrik om dit deur ‘n kenner, en in ooreenstemming met veiligheidsregulasies, te laat installeer. Kyk uit vir swakpunte waar die heining maklik omseil kan word deur op ‘n muur te trap of a nabygeleë boom vir hefkrag te gebruik.
• Sekuriteitstrale (“beams”) wat die area rondom jou woning, sowel as binne jou woning, dek – só opgestel dat verskillende sones geaktiveer kan word soos nodig. Dit dien as ‘n vroeë waarskuwingstelsel, sou misdadigers om of deur die eerste lae sekuriteit kom.
• Diefwering en sekuriteitshekke op alle deure – stewig vasgemaak sodat dit nie maklik omseil, gebreek of oopgebuig kan word nie. Sommige ouer huise is veral kwesbaar waar die sweiswerk wat diefwering aan die vensterraam vasmaak nie stewig is nie.
• Klein hondjies in die huis is ‘n hoogs onderskatte sekuriteitsmaatreël, Hulle skerp gehoorsintuig, sig en reuksintuig bied ‘n vroeë waarskuwingstelsel van onskatbare waarde.
• Dit is slim om jou sekuriteitstelsel aan ‘n goeie gewapende reaksiemaatskappy te koppel en om ook ‘n paniekknoppie aan hierdie stelsel te koppel.
• Kringtelevisiestelsels word toenemend bekostigbaar en bied ‘n maklike manier vir jou om ‘n oog op jou eiendom te hou – selfs oor groot afstande via ‘n slimfoon app. Sou jy ‘n slagoffer van misdaad word, is dit ook ‘n handige hulpmiddel vir die polisie om misdadigers vas te trek.

Virseker lig ook die volgende reëls uit vir goeie algemene sekuriteitspraktyk rondom jou huis:

• Kyk uit vir verdagte voertuie of individue, veral wanneer jy by jou huis ingaan, en stel die owerhede in kennis indien nodig. Beweeg vinnig wanneer jy tuiskom of jou huis verlaat.
• Varieer jou daaglikse roetine om dit moeiliker te maak vir misdadigers om te voorspel wanneer jy tuis sal wees.
• Vermy dit om vir misdadigers ‘n voorsmakie te gee van wat in jou huis is deur leë bokse van nuut-aangekoopte items oop en bloot te laat lê, gordyne wyd oop te los of enige deure, insluitend die motorhuisdeur, oop te los.
• Moenie jou motor- en huissleutels op ‘n plek los waar dit maklik toeganklik is nie – hou dit weggebêre in ‘n veilige plek wat slegs bekend is aan die lede van jou huishouding.
• Behou ‘n gesonde skeptisisme wanneer jy ‘n kontrakteur of permanente werker in jou huis toelaat – maak seker dat jy ‘n goeie agtergrondondersoek doen.
• Berg die kontakbesonderhede van alle nooddienste op jou foon of skryf dit neer waar almal in die huishouding maklik toegang daartoe het. Maak seker dat almal weet wat om te doen in ‘n noodgeval.
• Stel jou sekuriteitsmaatskappy in kennis wanneer jy vir verlengde tydperke nie tuis sal wees nie. Reël met iemand wat jy vertrou om jou huis gereëld te besoek, jou posstukke uit die posbus te haal, plante water te gee en verskillende ligte aan te skakel om die indruk te skep dat iemand tuis is.

“Sou dit gebeur dat jy ‘n slagoffer van ‘n inbraak word, is dit wys om jou besittings omvattend verseker te hê”, sluit Jennings af. “Maak seker dat jy jou huisinhoudslys gereëld opdateer en maak dubbel seker dat items teen hulle huidige vervangingswaarde verseker is.”

Virseker is ‘n produk van Auto & General Versekeringsmaatskappy Bpk.

LEES VOLGENDE: Minister van Gesondheid kondig NGV-implementeringsplan vir volgende vier jaar aan