Polisie skiet ses in KwaZulu-Natal dood

Ses verdagtes is in twee afsonderlike voorvalle deur die polisie in KwaZulu-Natal doodgeskiet. 

DIE VALKE HET OP ‘N HUIS TOEGESLAAN TOE DIE VERDAGTE LOS BRAND

Volgens brig. Jay Naicker, polisiewoordvoerder, het ʼn multidissiplinêre span, bestaande uit polisiebeamptes van verskeie eenhede en lede van die Valke, op ʼn huis toegeslaan en het die verdagtes op die beamptes losgebrand.

Vier mans wat vermoedelik by ʼn vlaag transitorooftogte betrokke was, is Donderdag in die vroeë oggendure in Camperdown tydens ʼn skietgeveg met die polisie noodlottig gewond. 

DIE VERDAGTES IS NOODLOTTIG GEWOND

Die polisie het teruggeskiet en die verdagtes noodlottig gewond. Daar is op drie vuurwapens beslag gelê. 

Lees ook: Negejarige vermoor glo skoolseun ná rusie

In die ander voorval het die polisie op ʼn hostel in Mariannhill toegeslaan toe daar ook op hulle losgebrand is. 

DAAR IS BESLAG GELê OP TWEE VUURWAPENS

Naicker sê twee verdagtes is noodlottig gewond tydens die skietgeveg. Daar is op twee vuurwapens beslag gelê. 

“Die polisie in KwaZulu-Natal bly daartoe verbind om wette te handhaaf en af te dwing. Verdagtes wat die gesag van die staat uitdaag deur op polisiebeamptes te skiet, sal self onder skoot kom,” het Naicker gesê.

Intussen het die polisie het twee vermeende plaasaanvallers is in hegtenis geneem vir die moorde van Christo Morrison (76) en sy vrou, Christa (73). 

DIE TWEE IS VRYDAG AANGEKEER IN BLOEMHOF

Volgens polisiewoordvoerder sersant Mahlomola Kareli het die provinsiale eenheid vir ernstige en gewelddadige misdaad het Vrydagmiddag omstreeks 14:00 inligting ontvang oor waar die verdagtes hulself bevind.

“Die span het met Welkom se taktiesereaksie-eenheid saamgewerk en na ʼn gastehuis in Bloemhof ontplooi. Twee mans, onderskeidelik 26 en 39 jaar oud, is in hegtenis geneem. Hulle het twee selfone, wat aan die slagoffers behoort het, in hul besit gehad.”

Lees ook: Twee aangekeer oor Glen-plaasmoorde

Kareli sê die twee verdagtes sal binnekort in die Bloemfontein-landdroshof verskyn op aanklag van huisroof en twee aanklagte van moord.