Twee mans met 40 kg se perlemoen betrap

Twee mans is in hegtenis geneem nadat hulle Donderdag met 40 kg se perlemoen by ʼn huis in Kariega (Uitenhage) in die Oos-Kaap betrap is.

DIE VALKE HET DONDERDAG ‘N WENK ONTVANG

Woordvoerder van die Valke kapt. Yolisa Mgolodela sê lede van die Valke het Donderdag rondom middagete ʼn wenk ontvang omtrent ʼn wit Ford Bantam- bakkie wat perlemoen na ʼn huis in die Veins-woonbuurt sou vervoer.

“Lede van die polisie, sowel as private veiligheidsdienste in die omgewing het die gebied gepatrolleer en om en by 13:30 is gesien hoe die bakkie by ʼn huis se agtertuin inry. Twee verdagtes het uit die bakkie geklim en ʼn deursigtige plastieksak die huis ingedra.”

TWEE PLASTIEKSAKKE MET 375 EENHEDE PERLEMOEN IS GEVIND

Toe die polisielede die bakkie nader en het die dieselfde twee verdagtes uitgekom na die bakkie, sonder die plastieksak.

Die polisie het hulle terug die huis ingeneem, waar twee plastieksakke gevul met 375 eenhede van perlemoen op die slaapkamervloer gevind is.

Mgolodela sê die perlemoen het 40 kg geweeg en is omtrent R40 000 werd.

DIE PERLEMOEN HET 40KG GEWEEG EN IS SOWAT R40 000 WERD

Die polisie het gevolglik die huis deursoek en op duiktoerusting en ʼn selfoon ter waarde van R60 000 beslag gelê.

LEES VOLGENDE: Ramaphosa amptelik weer ingesweer as president van Suid-Afrika

“Die polisie vermoed ook die bakkie is in die uitvoer van ʼn misdaad gebruik en daar is beslag gelê op die voertuig. Die twee verdagtes, onderskeidelik 23 en 24 jaar oud, is op die plek in hegtenis geneem en sal Maandag in die landdroshof in Kariega verskyn.”

WAT IS PERLEMOEN?

Suid-Afrikaanse perlemoen (Haliotis midae) is ’n endemiese spesie. Dit is ’n hoëwaarde produk, maklik bereikbaar en word langs ’n uitgebreide deel van die kuslyn aangetref.

Maar soos iol.co.za vroeër vanjaar berig het, het ’n georganiseerde verskaffingsketting byna gelei tot die uitwissing van die spesie, die korrupsie van staatsinstellings en bendegeweld in verarmde gemeenskappe aangevuur.