Hoe om te vermy om ‘n skedonk te koop: 16 wenke

Jy’t ‘n gebruikte voertuig gekoop en gedink dis die winskopie van ‘n leeftyd, maar nou is daar ‘n meganiese probleem wat die dienssentrum sê ‘n fortuin sal kos om te herstel. Dié is die tipe nagmerrie wat te veel Suid-Afrikaners wat tweedehandse voertuie gekoop het al deurgemaak het. Virseker doen ‘n beroep op karkopers om oordeelkundig te werk te gaan.

“Jy kan vir jouself enige iets van ‘n reuse herstelprojek, tot ‘n ongeluk wat wag om te gebeur, koop as jy nie versigtig is nie”, sê Johanni Jennings, Hoof van Suid-Afrika se enigste trots-Afrikaanse versekeraar, Virseker. “Wanneer jy ‘n gebruikte voertuig koop, is dit noodsaaklik dat jy deeglik ingelig is en ‘n gesonde skeptisisme handhaaf om te verseker dat jy nie ‘n regte skedonk koop nie.”

Virseker stel 16 slim stappe voor om te volg wanneer jy ‘n gebruikte voertuig koop:

1. Doen jou huiswerk. Lees aanlynforums en resensies om seker te maak dat die voertuig wat jy wil hê nie geneig is tot probleme nie, en om ‘n idee te kry van wat ‘n redelike prys is vir die presiese voertuig wat jy wil koop.
2. Kry agtergrond-inligting. Om ‘n voertuig van ‘n betroubare handelaar met ‘n goeie naverkope-rekord te koop, is eersteprys. In die geval van ‘n privaat verkoper, vra soveel vrae as wat jy moet om seker te maak dat jy nie moeilikheid op wiele koop nie.
3. Snuffel rond. Moenie tevrede wees met die eerste beste kopie wat jou pad kruis nie. Besoek ander handelaars of privaat verkopers om na ander soortgelyke voertuie te kyk en hulle vir ‘n toetsrit te neem. Wanneer jy aanlyn soek, gebruik die “gunstelinge”-knoppie wat baie webwerwe bied om jou keuse tot ongeveer vyf voertuie af te skaal, wat jy dan maklik kan vergelyk.
4. Kyk na die kilometers. Voertuie met hoë kilometers beteken oor die algemeen hoër onderhoudskostes en is meer geneig tot duur herstelwerk. Terwyl dit dalk in die korttermyn na ‘n kostebesparing lyk, kan die langtermynkostes jou baie duur te staan kom.
5. Die belangrikheid van ‘n diensrekord (“FSH”). Motors wat ‘n volledige diensrekord by agente, of ‘n goeie, RMI-geakkrediteerde dienssentrum het, is oor die algemeen beter kopies. Indien die voertuig se dienste nie op datum is nie, dring aan daarop dat die handelaar die motor diens as ‘n voorwaarde vir die koop.
6. Ongeluk- en diefstalverslag. Ongelukbeskadigde voertuie, of dié wat onder misdaad, soos diefstal, deurgeloop het, is ‘n hoë risiko om te koop. Dit is veral waar wanneer die voertuig se enjin of elektroniese komponente geaffekteer is. Bevestig dat die motor ongeluk- en voorvalvry is en maak gebruik van ‘n agtergrond-nagaandiens indien nodig.
7. Kyk vir lekplekke. Olie en ander vloeistowwe wat lek, selfs al is dit net ‘n bietjie, is ‘n duidelike teken van swak onderhoud of skade. Maak seker dat jy onder die voertuig, en ook in die enjinkompartement, loer. ‘n Vuil, olierige enjin is een waarby jy liefs moet verbystuur.
8. Gaan die bande na. Bande wat glad of oneweredig verslyt is kan enige iets van slegte wielbelyning en -balansering, tot verslyte skokbrekers, tot ‘n beskadigde veringstelsel beteken.
9. Binneruim-inspeksie. Kyk uit vir enige krake, barse en skeure in die binnepanele en sitplekmateriaal. Gewone verslyting, ooreenstemmig met die ouderdom van die voertuig, is aanvaarbaar, maar ‘n gekraakte paneelbord, of vermiste paneel, byvoorbeeld, kan ‘n veel groter probleem aandui.
10. Skakel die motor aan en neem dit vir ‘n toetsrit. ‘n Voertuig wat goed onderhou is behoort geensins te sukkel om aan te sluit of glad te loop nie. Dit behoort nie uitermatig te rook nie en die ritkwaliteit behoort glad en sonder ‘n gestotter, ratprobleme, vibrasies, remgeluide, stuurkasgeluide en uitermatige geratel te wees. Dis wys om die voertuig vir ‘n behoorlike toetsrit oor ‘n verskeidenheid padoppervlaktes, en in verskeie verkeerstoestande, te neem. Maak seker dat jy die radio afskakel sodat jy mooi kan luister vir enige kommerwekkende geluide.
11. Veiligheidstoets. Veiligheidstelsels soos sitplekgordels en lugsakke is ‘n móét om na te gaan. Indien enige van hierdie stelsels nie werk nie en herstel moet word, stuur eerder verby.
12. Toets die elektroniese stelsels. Maak seker dat alle elektriese en elektroniese stelsels werk. Toets die ligte, die ruitveërs, die verwarmer en verkoelingstelsels, die GPS stelsel ens. om seker te maak dat alles werk. Gaan ook die instrumentpaneel na vir foute en waarskuwings, asook abnormale lesings.
13. ‘n Toets wat die moeite werd is om voor te betaal. Jy kan vra vir ‘n deeglike, 101-punt oorsig deur ‘n betroubare inspeksiemaatskappy, net om seker te maak dat die voertuig meganies in ‘n goeie toestand is. So ‘n toets kan jou – of die handelaar wat bereid is om dit te doen – ‘n paar honderd rand uit die sak jaag, maar dis beslis die moeite werd vir ekstra gemoedsrus.
14. Neem ‘n verlengde waarborg uit. Verskeie maatskappye bied verlengde waarborge vir gebruikte voertuie aan en, solank die voertuig versien word volgens die vervaardiger se spesifikasies, kan hulle vir jou dekking aanbied vir enige iets van net die sleutelkomponente tot meer omvattende dekking.
15. Pasop vir die “winskoop van ‘n leeftyd”. As ‘n kopie te goed lyk om waar te wees, ís dit waarskynlik.
16. Wees gewillig om verby te stuur. Vermy die versoeking om ‘n voertuig net daar en dan te koop, veral wanneer dit by winskopies kom. Gun jouself eerder die tyd om ‘n ingeligte, rasionele besluit te neem om kopersberou te vermy.

“’n Haastige besluit op die ingewing van die oomblik is amper altyd ‘n duur een. Om meer tyd op navorsing en die vra van die regte vrae te spandeer, sowel as om met kenners te gesels, sal alles bydra tot ‘n meer ingeligte besluit, en sal jou ‘n sin van rustigheid en selfvertroue gee wanneer jy in jou nuwe wiele is”, sluit Jennings af.

Virseker is ‘n produk van Auto & General Versekeringsmaatskappy Bpk, ‘n gemagtigde finansiële-diensverskaffer (FDV-lisensienommer: 16354)

Enige verwysing na “ons”, “deur” of “met” op hierdie webwerf/advertensie verwys na Auto & General.

LEES VOLGENDE: Tshwane implementeer strenger maatreëls teen onwettige vullisstorting