Hoe verbruikers die vyf gevare, of 5 G’s, van winter kan vermy

Met temperature wat begin daal, maan Virseker verbruikers om proaktiewe stappe te neem teen die 5 G’s – 5 unieke wintergevare – wat enigiets van ongerief, tot groot skade en selfs sterftes kan veroorsaak.

“Die een ding wat te veel slagoffers van winterinsidente in gemeen het is die idee van ‘dit kan nie met my gebeur nie’, maar toe hét dit ongelukkig,” sê Johanni Jennings, Hoof van Virseker, “’n Reaktiewe benadering kan jou duur te staan kom, so betydse, deeglike en proaktiewe voorsorgmaatreëls is absoluut noodsaaklik.”

Virseker lig die 5 gevare wat gereëld chaos in die winter veroorsaak uit en verskaf wenke oor hoe om hulle aan te spreek: 

GEYSERS

Virseker se eisdata dui aan dat geysereise tussen Junie en Augustus vir 33% van jaarlikse geysereise verantwoordelik is. ‘n Gebarste geyser kan enigiets van ‘n effense ongerief tot groot eiendomskade of selfs erger tot gevolg hê.

• Geysers moet minstens elke 3 jaar deur ‘n gekwalifiseerde loodgieter versien word. Dit sluit die nagaan van komponente soos die anode, element en termostaat, die verwydering van kalk van die tenk en element en ‘n inspeksie vir lekplekke in. Dis ook wys om seker te maak dat die geyser op ‘n optimale temperatuur – gewoonlik rondom 60⁰C gestel is.

• Belê in ‘n geyserkombers en tydhouer om nie alleen op elektrisiteit te bespaar nie, maar ook om te help om ‘n gebarste geyser te vermy.

• Dis noodsaaklik om ‘n druppan onder jou geyser te hê en seker te maak dat die afleipyp meeste van die water sal wegvoer indien jou geyser bars om verdere skade te voorkom.

• Spaar deur jou geyser van tyd tot tyd af te skakel, veral gedurende spitstye, maar moenie dit te koud laat word nie, aangesien hierdie addisionele uitsit-en-sametrekkingsiklus die geyser se lewensduur kan verkort en ook meer elektrisiteit kan gebruik om die water weer te verhit.

• Kyk uit vir die vroeë waarskuwingstekens van ‘n geyser wat ingee. Wanneer water nie meer so warm soos gewoonlik is nie, waterdruk laag is, te veel water of stoom uit die geyser se oorlooppyp op jou dak kom, die geyser vreemde geluide maak of jy nat kolle naby die geyser opmerk, moet dit so gou moontlik nagegaan word.

• As jou geyser bars, skakel dadelik die elektriese hoofskakelaar sowel as die hoof watertoevoer af en kontak jou versekeraar en ‘n loodgieter. 

GEREELDE BEURTKRAG

Ons kragnetwerk is onder groot druk en beurtkrag is ‘n konstante bedreiging. ‘n Mens moet ekstra voorsorg tref wanneer jy alternatiewe krag-, lig- en hittebronne gebruik. Virseker het bevind dat 90% van jaarlikse brandeise gedurende die wintermaande ingedien word.

• Maak seker dat alle verhittings- en ander toestelle SABS-goedgekeur is en, waar van toepassing, deur ‘n gesertifiseerde diensverskaffer geïnstalleer word. Toestelle wat verkeerd geïnstalleer is was al die oorsaak van talle sterftes in Suid-Afrika.
• Neem gasbottels vir verwarmers, braaie en stowe gereëld na jou plaaslike gasspesialis, of laat hulle tuis deur ‘n kenner nagaan, om seker te maak dat hulle nie lek nie.
• Gebruik toestelle binne die vervaardiger se perke. Om byvoorbeeld ‘n toestel vir lang periodes op maksimum hitte te los, nie ‘n toestel op ‘n gelyke oppervlak te plaas nie en om dit rond te skuif terwyl dit in gebruik is, kan soms ‘n groot risiko inhou.
• Wanneer die kragtoevoer af is, maak seker dat jy enige toestelle wat ‘n brandgevaar inhou wanneer die toevoer herstel word afgeskakel is.
• Met ‘n gasverwarmer of -stoof, steek eers die vuurhoutjie of aansteker aan voordat jy die gas oopdraai, anders kan oormatige gas opbou en ‘n brandgevaar veroorsaak.
• Hê brandblussers byderhand, veral naby die kombuis. Maak seker dat jy weet hoe om dit te aktiveer en hanteer.

GEUTE

Geute en omliggende strukture gaar gewoonlik takkies, blare en ander oorskot op wat maklik vlam kan vat en ‘n brand kan veroorsaak. Maak seker dat hierdie strukture skoon is om nie alleen die brandgevaar te beperk nie, maar ook die opbou van water en verwante skade kan verhoed wanneer die reënseisoen begin.

GAPINGS

Klein krakies of gapings in mure, pilare en vensterrame kan katastrofes wees wat wag om te gebeur. Vog versamel gewoonlik in hierdie gapings, sit uit in die koue en veroorsaak dat strukture onstabiel raak of selfs meegee. Gaan jou huis en strukture gereëld hiervoor na.

GLANS

Winterglans, waar motoriste tydelik deur die son verblind word, dra by tot duisende ongelukke wêreldwyd. In die winter is die son naby die horison gedurende oggend- en middag spitsverkeer, en voertuie se sonskerms bied min of geen beskerming. Dra ‘n goeie sonbril en pas jou spoed aan wanneer sigbaarheid laag is.

“In die geval waar die noodlot wel tref, is dit slim om alle noodnommers binne bereik te hê en alle lede van jou huishouding behoorlik voor te berei oor wat om in ‘n noodgeval te doen,” sluit Jennings af. “Dis ook van kritieke belang om goeie, omvattende versekering in plek te hê om seker te maak dat herstel- en vervangingswerk so gou moontlik gedoen kan word en jou in ‘n japtrap weer op en aan die gang kan kry.”

LEES VOLGENDE: Hoe jy hawelose diere in KwaZulu-Natal kan help