SA versekeraars staan kop en skouers uit bo ander industrieë

Suid-Afrikaanse verbruikers stel voortdurend hoër eise om elke rand wat hulle aan versekering spandeer sover as moontlik te strek. Volgens onlangse navorsing het SA versekeraars goed hierop reageer en bied hulle voortdurend verbeterde diens en ‘n wyer reeks produkte, maar hoe kan jy seker maak jy kies verseker die beste versekeraar vir jou begroting en individuele behoeftes?

Kies die beste versekeraar vir jou

Volgens PwC Suid-Afrika se mees onlangse Versekeringsentiment-Indeks doen versekeraars in Suid-Afrika beter as bankwese, kleinhandel en telekommunikasie wanneer dit by positiewe sentiment kom, met ‘n reuseverbetering van -0.4% netto sentiment in 2021, tot ‘n positiewe 6.8% in 2022 en ‘n selfs hoër 16.1% netto sentiment in 2023.

“Dit lei tot vurige kompetisie in die korttermynversekeringsbedryf, wat tot verbruikers se voordeel strek en aan hulle ‘n legio van opsies bied,” sê Johanni Jennings, Hoof van Suid-Afrika se enigste trots Afrikaanse versekeringshandelsmerk, Virseker, “Dis juis om hierdie rede dat dit belangrik is vir verbruikers om hulle navorsing deeglik te doen, behoorlik rond te snuffel en nie die eerste kopie as die enigste of beste te aanvaar nie.”

Navorsers se suksesmerkers getuig ook van Suid-Afrikaners se hoë standaarde om maksimum waarde vir hulle geld te kry, veral in uitdagende ekonomiese omstandighede.

Die Suid-Afrikaanse verbruikerstevredenheidsindeks (of SA-csi), waarin Virseker jaarliks onder die Top 3-presteerders tussen korttermynversekeraars val, meet verbruikers se tevredenheid aan faktore soos waargenome kwaliteit, waargenome waarde vir geld, regverdige behandeling van kliënte, kliëntelojaliteit, gemoedsrus, kundigheid en die aanbied van maklik verstaanbare produkte.

Met hierdie “inkopielys” in gedagte, bied Virseker die volgende wenke oor hoe om die beste korttermynversekeraar te kies en jou versekering slim te bestuur:

• Kliëntediens: Vergelyk verskeie versekeraars se terugvoer van kliënte om jou te help om ‘n ingeligte besluit te neem. Virseker se reputasie om 100% van geldige eise uit te betaal en sy jaar-na-jaar prestasie as een van die top versekeringshandelsmerke in SA, toon byvoorbeeld dat dit nie net bemarking is nie, maar werklik uitmuntende kliëntediens.

• Vergelyk verskeie opsies: Neem jou tyd om rond te snuffel en ‘n versekeraar te kry wat die beste aan jou behoeftes voorsien. Tariewe, produkte en voordele verskil van een versekeraar na die volgende en die eerste kopie wat jou pad kruis mag nie noodwendig die beste wees nie. Onthou ook dat dit nie altyd die beste idee is om net vir die goedkoopste kwotasie te mik nie. Behalwe vir die prys, moet jy ook die vlak van dekking, die voorwaardes van dekking en die bybetaling wanneer jou besittings gesteel of beskadig word, of wanneer jy in ‘n ongeluk is, in ag neem.

• Begroot slim: Wees realisties oor jou begroting en maak seker dat jou versekeringspremie en bybetaling bekostigbaar is.

• Verseker teen die regte bedrag: Waak teen oorversekering, waar jy jou besittings vir meer verseker as wat nodig is, sowel as onderversekering, waar jy dit vir te min verseker en nie voorsiening maak om uitstaande skuld op ‘n voertuig of eiendom mét rente terug te betaal, of vir die hoër koste om ‘n item met ‘n nuwe een te vervang nie. Maak seker dat, soos wat items waarde verloor of bykry, jou versekeraar die versekerde bedrag dienooreenkomstig aanpas, want nie alle versekeraars doen dit outomaties nie.

• Vors pakkette deeglik na: Onthou dat daar pakkette vir meer omvattende versekering beskikbaar is, sowel as derdeparty-dekking en dekking slegs vir spesifieke risiko’s soos brande en diefstal.
  • Omvattende versekering sal jou dek vir skade aan en diefstal van jou eiendom en besittings, sowel as dié van ‘n derdeparty.
  • Derdeparty-versekering sal byvoorbeeld jou eie voertuig dek vir sekere gespesifiseerde skade soos brande en diefstal, maar nie vir ongelukskade nie. Skade aan ‘n derdeparty se eiendom, voertuig en/of besittings sal egter wel gedek word.

• Ekstra dekking: Kyk na opsies soos voertuighuur, krap- en duikdekking, band- en vellingdekking en opknappingsdekking / “top up”-dekking – iets wat jou dalk ‘n paar rand ekstra kos, maar jou in die lang duur heelwat geld kan spaar.

• Moenie dekking dupliseer nie: As jou versekeringsmaatskappy byvoorbeeld gratis padbystand bied, het jy nie dieselfde voordeel van jou mediese fonds nodig nie.

• Knap sekuriteit op: Jou premie word bereken volgens jou risikoprofiel, wat weer gebaseer word op verskeie faktore, onder andere waar jy woon, die tipe voertuig wat jy besit en die sekuriteitsmaatreëls wat jy in plek het. Jy kan dalk kwalifiseer vir ‘n laer premie indien jy jou voertuig en huis se sekuriteit opknap.

• Waarde-toegevoegde voordele: Dis belangirk om ekstra voordele soos tuisbystand, padbystand, vermaaklikheidsbystand, traumabystand, wegsleep-bystand, regsbystand en mediese bystand, sowel as kontant terugvoordele soos die Virseker Gatsakbonus, te vergelyk, omdat dit jou  baie moeite en ‘n hele paar rand kan spaar.

• Hersien: Dis wys om jou dekking gereëld te hersien. Soos jou individuele behoeftes verander, mag jou versekeringsbehoeftes ook. Jy mag byvoorbeeld nie omvattende dekking benodig op ‘n ouer of tweede voertuig nie, en kan dalk meer beperkte dekking oorweeg.

“In ‘n see van opsies is die inwin van inligting en insig van kardinale belang. Met deeglike navorsing en ‘n geldslim-benadering wat steeds nie kortpaaie neem nie, kan jy seker maak dat jy genoegsaam verseker is en so gou moontlik na ‘n krisis weer op jou voete kan wees, én goeie byvoordele kan geniet, sonder om ‘n fortuin daarvoor te betaal,” sluit Jennings af.

LEES VOLGENDE: Misdadigers in Suid Afrika slaan toe op bewegende teikens