Misdadigers in Suid Afrika slaan toe op bewegende teikens

Misdadigers in Suid Afrika teiken al hoe meer gereëld slagoffers wat aan die beweeg is en steel veral kleiner, hoëwaarde-items. Virseker moedig die publiek aan om waaksaam te wees.

Gedurende onlangse maande het Virseker ‘n toename van 14% in eise vir draagbare goederediefstal en ‘n 8% in eise vir diefstal uit voertuie opgemerk.

“Hierdie neigings is waarskynlik daaraan toe te skryf dat klein items soos selfone, skootrekenaars, tabletrekenaars en selfs beursies nie alleen baie werd is nie, maar ook eenvoudig makliker is om te steel en weg te steek,” sê Johanni Jennings, hoof van Virseker. “Dié items word gereëld teen ‘n fraksie van hulle normale prys op die swartmark of aan heeltemal onskuldige, niksvermoedende kopers gesmous.”

Algemene maniere waarop misdadigers in Suid Afrika hierdie items steel:

• Deur by ‘n voertuig in te breek deur fisies die deurslot of venster te breek, of toegang te verkry deur vensters en sondakke wat oop vergeet word,
• “Sliding”, wat verwys na ‘n slinkse taktiek om die agterdeur van ‘n voertuig stilletjies oop te maak net soos wat iemand ‘n ander deur van ‘n voertuig toemaak, voordat hulle die alarm aktiveer en sonder dat hulle iets vermoed,
• Deur ‘n voertuig se afstandbeheerder se sein te belemmer en te verhoed dat die voertuig sluit,
• Deur sleutelvrye toegangstelsels se sein te versterk en so jou voertuig se sekuriteitstelsel te flous om te dink dat jy en jou sleutel naby is en oop te bly, of oop te sluit,
• Deur waardevolle items uit jou handsak of van ‘n tafel te gaps wanneer jy wegkyk, of deur aktief jou aandag af te lei terwyl ‘n medepligtige items steel,
• Oudmodiese sakkerollery.
• Deur jou eenvoudig trompop te loop en te gryp wat hulle wil hê en jou selfs met geweld of ‘n wapen te dreig.

Virseker bied die volgende wenke om te voorkom dat jy ‘n slagoffer word:

JOU VOERTUIG:

• Beveilig: Wanneer jy tuis is, maak seker dat jou voertuig deeglik beskerm word deur soveel sekuriteitstelsels as moontlik, beide op jou eiendom en die voertuig self. In die openbaar is dit slim om jou voertuig in ‘n veilige, goed-beligte area te parkeer – ideaal êrens waar ‘n sekuriteitswag aan diens is.
• Maak dubbel seker: Gaan fisies jou voertuig se deure na om seker te maak dat dit gesluit is, selfs al het die alarm geaktiveer.
• Vinnige blik: Wees waaksaam soos wat jy uit jou voertuig klim en maak seker dat geen verdagte individue naby rondhang nie.
• Hou skoon: Verwyder alle items uit jou voertuig aan die einde van ‘n dag, sodat jy niks agterlaat wat misdadigers in die versoeking kan lei nie.
• Beskermende laag: Teen-grypdiefstalfilm op jou voertuig se ruite bied ‘n ekstra beskermende laag. Vermy dit ook om met vensters te ver oop te ry.
• Weggepak: Waardevolle items soos fone en handsakke moet buite die gesigsveld van dwalende oë gehou word, selfs wanneer jy bestuur.
• Altyd aan jou: Moet nooit huissleutels of belangrike dokumente in jou voertuig los nie.

OOR DIE ALGEMEEN:

• Net die nodigste: Hou slegs wat jy nodig het by jou. Moenie jou beursie met kredietkaarte en kontant, of jou hele handsak met ander waardevolle items en dokumente saamneem as net ‘n R200 noot nodig is nie.
• Ligging is belangrik: Vermy plekke wat bekend is vir misdaadaktiwiteite en kies eerder dié wat oor die algemeen veilig is, waar daar sekuriteitswagte aan diens is en waar moniteringstoestelle soos kringtelevisiestelsels in plek is.
• Hou jou oë oop: Hou waardevolle items ten alle tye binne jou gesigsveld.
• Moenie adverteer nie: Moenie waardevolle items oop en bloot, of in ‘n sak wat nie behoorlik toe is en opgepas word, los nie. Vermy dit om met jou selfoon, beursie of ander waardevolle items in jou hand te loop.
• Veiligheid in groepe en waakbeurte: Om in groepe uit te gaan is oor die algemeen veiliger as om alleen te gaan, met meer oë wat skelms betyds kan bespied. Met familie-aktiwiteite is dit wys om beurte te maak om ‘n ogie oor waardevolle items te hou.
• Agter slot en grendel: Maak gebruik van kluise wat in baie openbare areas beskikbaar gestel word sodat jy kan ontspan jouself sorgvry kan geniet.
• Pasop vir vreemdelinge: Wees versigtig vir vreemdelinge wat lukraak met jou gesels, of “per ongeluk” in jou vasloop in ‘n skare. Hulle mag dalk besig wees om jou aandag af te lei terwyl jou besittings agter jou rug gesteel word.
• Maak vriende: Wanneer jy verlengde tye in ‘n openbare area spandeer, is dit slim om die mense om jou te leer ken en te kyk wie jy kan vertrou om ‘n ogie oor jou besittings te hou, en ook sodat jy vreemdelinge kan opmerk wat nie in jou of hulle spasie hoort nie.
• Paniekknoppie: Dis slim om in ‘n mobiele paniekknoppie te belê of om ‘n noodtoepassing / app op jou foon te hê wat jou maklik met nooddienste kan verbind en jou ligging met hulle kan deel.

“Ten spyte van ons beste pogings, slaan die ongeluk steeds van tyd tot tyd toe, so dis wys om genoegsame draagbare besittingsversekering in plek te hê, en om items te spesifiseer wat jy gereëld in jou voertuig rondry of aan jou dra. Dit sluit items soos juweliersware, skootrekenaars en tablette, kameras, klere en brille, sowel as selfone in. Dit sal help om jou so gou moontlik weer op en aan die gang te kry,” sluit Jennings af.

LEES VOLGENDE: Paasnaweek: Regering dring daarop aan om waaksaam te wees oor padveiligheid