Talle Suid-Afrikaners is onder- of onverseker: Spaar só op versekering

Knap beursies dryf baie Suid-Afrikaners daartoe om elke sent om te draai. Daar’s talle maniere om dit reg te kry, maar dis belangrik om dit slim en verantwoordelik te doen om ‘n finansiële krisis te vermy, veral wanneer dit by versekering kom.

Ekonomiese onsekerheid, ‘n verhoging in energiepryse en ‘n verhoging in algemene lewenskostes plaas enorme druk op Suid-Afrikaners, met DebtBusters se mees onlangse Money-Stress Tracker wat bevind het dat 78% van Suid-Afrikaners finansiële stress ervaar. ‘n Kombinasie van ‘n gebrek aan tydige optrede, vernedering en ‘n tekort aan vertroue lei daartoe dat bitter min van hulle iets hieromtrent doen.

Sommige neem egter drastiese stappe en sny kostes in areas wat hulle in die korttermyn geld spaar, maar hulle weerloos laat vir langtermyn skade en finansiële katastrofe: Volgens die AA, is die meerderheid van die meer as 11 miljoen geregistreerde voertuie in Suid-Afrika – tussen 60 en 70% – nie verseker nie. Dieselfde geld vir talle huishoudings, waar geboue én huisinhoud te dikwels onversekerd of onderversekerd gelaat word.

Dit beteken dat baie geboue, huisinhoud en motors met of te min dekking, of geen dekking teen ongelukke, diefstal of derde party skade gelaat word.

“Deur dit te doen loop verbruikers ‘n reuse finansiële risiko indien iets met hulle besittings gebeur”, sê Johanni Jennings, Hoof van Virseker. “Hulle sal nie alleen ‘n allemintige bedrag uit hulle eie sakke moet opdok om weer op die been te kom, of aan finansiële diensteverskaffers die uitstaande bedrag verskuldig wees nie, maar as daar derdeparty skade is, sal hulle hulself in ‘n selfs dieper finansiële verknorsing bevind.”

Wenke om die beste waarde uit jou versekering te kry

Met inagname hiervan, bied Virseker die volgende slim wenke om maksimum waarde vir jou geld te kry wanneer dit by versekering kom:

1. Snuffel rond: Sou jy dink dat jy nie die beste waarde vir geld gekry het ten tye van jou aankoop nie, snuffel rond vir alternatiewe kwotasies wat spesifiek vir jou behoeftes en risikoprofiel aangepas is.
2. Maak verantwoordelike skuiwe: Moenie jou huidige versekering kanselleer voordat jou nuwe versekering in plek is nie. Maak seker dat jy die nuwe kwotasie aanvaar het en ‘n formele bevestiging van jou nuwe versekering het voordat jy enigiets kanselleer.
3. Neem ingeligte besluite: Doen jou huiswerk voordat jy ‘n versekeraar kies om seker te maak dat jy die beste waarde vir geld en die korrekte dekking kry. In sommige gevalle, soos met gefinansierde voertuie, sal jy vereis word om omvattende versekering uit te neem, maar jy kan kies by watter versekeraar om dit uit te neem. Kyk na watter waarde-toevoegings elke versekeraar bied en gaan hulle bepalings en voorwaardes na voordat jy ‘n kontrak onderteken. Dit is van kritieke belang om te weet waarteen jy gedek word en waarteen nie, veral wanneer dit by die eisproses kom. Oorweeg ook die opsie om vir krediettekortversekering aansoek te doen op gefinansierde items, wat die verskil tussen die versekerde bedrag en die totale afbetalingsbedrag dek.
4. Verstaan jou versekeringstaal – daar’s ongetwyfeld baie brabbeltaal in versekering wat jou kan verwar. Indien jy nie sekere bepalings en voorwaardes verstaan nie, kontak jou versekeraar en vra hulle om dit te verduidelik. Dit kan jou oor die langtermyn heelwat geld en frustrasie spaar. Belê tyd daarin om versekering vrae en antwoorde te lees om seker te maak dat jy goed ingelig is.
5. Ken jou bybetalings – ‘n bybetaling is die eerste bedrag betaalbaar deur ‘n kliënt wanneer hulle eis en word nie deur versekering gedek nie. Hoe laer jou premie, hoe hoër sal jou bybetaling waarskynlik wees, en omgekeerd. Daar mag ook addisionele bybetalings deur jou versekeraar gehef word, so maak seker dat jy deeglik bewus is daarvan en weet watter op jou van toepassing is.
6. Prioritiseer jou versekeringspremies: Ons weet dat, in swaar tye, versekering menigmaal die eerste uitgawe is wat besnoei word. Hoewel dit ‘n mate van verligting in die korttermyn kan bring, kan dit jou eindelik heelwat meer kos indien jy in ‘n ongeluk betrokke is of jou voertuig gesteel word. Die geld wat jy elke maand bespaar het sal nie eers vergelykbaar wees met die tien- of honderde duisende rande wat jy moontlik uit jou sak sal moet opdok nie.
7. Kombineer om te spaar: Baie versekeraars bied afslag indien jy beide jou motor en huisinhoud deur hulle verseker en selfs meer wanneer jy geboueversekering ook insluit. Vind uit oor kombinasie-opsies waar jy dalk kan spaar en jou premies verlaag.
8. Hou jou persoonlike besonderhede op datum: Onthou dat dinge soos waar jy woon en jou voertuig parkeer kritieke faktore is vir jou versekeraar om jou vlak van risiko te bepaal en jou premie uit te werk. Om jou versekeraar op hoogte te hou van veranderinge verseker nie alleen dat jou dekking geldig bly nie, maar kan selfs jou premies verminder.
9. Verhoog jou sekuriteit: Die aanbring van elektriese heinings, installering van naspoortoestelle, die aanbring van alarms ensomeer sal in jou guns tel wanneer dit by die onderhandeling van ‘n meer gunstige versekeringspremie kom
10. Gaan jou versekering na: Probeer om minstens een keer ‘n jaar jou inventaris van versekerde items en versekerde waarde na te gaan om seker te maak dat jy nie oor- of onderverseker is nie.Ondersoek waarde-toegevoegde dienste wat, teen ‘n lae maandelikse premie, goeie dekking kan bied teen dinge soos klein krappies en duikies, skade aan wiele en bande, of noodbystand en ander dienste – soos loodgieters en elektrisiëns – by jou huis.

“Versekering is ‘n absolute noodsaaklike deel van enige huishoudelike begroting. Deur slim te werk te gaan kan ‘n mens teen ‘n sakpas prys versekering kry wat perfek voldoen aan jou behoeftes, en jou binne  japtrap weer op jou voete sal kry indien die ongeluk jou tref,” sluit Jennings af.

LEES VOLGENDE: SA versekeraars staan kop en skouers uit bo ander industrieë