Vermiste emosionele ondersteuningshond gevind

Die vermiste emosionele ondersteuningshond, Rico wat vroeër vandeesmaand in Brakpan vermis geraak is, is gevind.

RICO HET VROëR DIE MAAND VERMIS GERAAK

Rico, is ‘n goue cockerspanjoel wat op 5 Junie vanuit Brakpan, vermis geraak het.

Mienkie Barker, Rico se eienaar, is oorstelp oor haar ondersteuningshond se terugkoms.

ʼn Emosionele Mienkie het Donderdag op TikTok gesê sy sal nie ophou soek na Rico nie, aangesien hy soveel meer as net ʼn hond vir haar is.

SY EIENAAR, MIENKIE BARKER WAS MOEDELOOS EN HET NUUS OP TIKTOK GEDEEL

“Hy volg my oral en los my nooit nie. Deur alles wat ek gegaan het, was Rico daar vir my.”

Raymond de Wet, ʼn vrywilliger wat Mienkie deur die hele proses bygestaan het en geld vir die beloningsbedrag bygedra het, het ʼn boodskap op sy Facebook-blad geplaas waarin hy verduidelik dat hy en ʼn paar ander inwoners op nóg ʼn soektog vir die hond vertrek.

LEES OOK: Bekende Mbombela-narkotiseur dood in woonstel gevind

Ongeveer vyf uur later het Raymond die goeie nuus op sy Facebook-blad aangekondig: “Rico is gevind.”

RICO IS GEVIND EN HERENIG MET MIENKIE

Raymond het later foto’s van Mienkie en Rico saam gedeel, en hierdie keer was dit trane van blydskap wat Mienkie se wange natgemaak het.

Opgewonde boodskappe van geluk het begin instroom, en vir almal wat Rico se soektog gevolg het, was dit ʼn welkome verligting.

Die Facebook-gemeenskap het hul dank uitgespreek teenoor Raymond en sy volgehoue vasberadenheid om Rico te vind. Rico is tans vir ʼn ondersoek by die veearts.