Lewis Hamilton sluit na bewering by Ferrari aan

Die sewemalige wêreldkampioen Lewis Hamilton sal na bewering Mercedes verlaat en in die 2025 Formule Een-seisoen by teenstanders Ferrari aansluit, volgens verskeie berigte Donderdag.

LEES OOK | Suid-Afrika se hittegolf duur voort

Volgens die BBC, Sky, Autosport, die Italiaanse koerant Gazzetta dello Sport en ander media wil die Italiaanse span hê dat die 39-jarige Brit saam met die huidige jaer Charles Leclerc saamwerk.

Dit sal ‘n verrassende stap wees aangesien Hamilton ‘n tweejaarkontrak met sy huidige span Mercedes vir die 2024- en 2025-seisoene onderteken het, maar die ooreenkoms bevat glo ‘n klousule wat hom toelaat om na een seisoen te vertrek.

Hamilton het die laaste van sy wêreldtitels in 2020 gewen, maar die 2021-kampioenskap op omstrede wyse verloor aan Max Verstappen, wat 13 jaar jonger as hy is.

LEES OOK | MSC Poesia gaan vanjaar drie Suid-Afrikaanse hawens besoek

Die Nederlandse Red Bull-jaer het sedertdien oorheers, terwyl Hamilton in 2022 sesde in die jaers se puntelys geëindig het en in 2023 derde.

Ferrari, wat erken het dat hulle in 2019 gesprekke met Hamilton gevoer het om in die toekoms by hulle aan te sluit, het geweier om kommentaar te lewer op die berigte dat hulle ‘n oorskakeling vir die 2025-seisoen onderhandel.

‘n Ferrari-woordvoerder het gesê: “Ons lewer nie kommentaar op gerugte nie.”

Mercedes het nie geantwoord toe hullle deur AFP gekontak is nie.

Hierdie is ‘n ontwikkelende storie …