Brandstofpryse daal Woensdag, maar die verligting is van korte duur

Na maande van prysverhoging op prysverhoging kry motoriste uiteindelik asemruimte. Vanaf Woensdag 4 November sny die regering die algemene brandstofheffing met R3 per liter op diesel en R1,50 op petrol. Finansiesminister Enoch Godongwana het die tydelike brandstofverligting in Oktober in die Parlement aangekondig.

Die jongste syfers van die Sentrale Energiefonds dui daarop dat 95-petrol met sowat 49c per liter kan daal, terwyl diesel tussen R1,58 en R1,68 per liter goedkoper kan word. Die Departement van Minerale en Petroleumhulpbronne moet die amptelike pryse egter nog bevestig.

As die voorspellings klop, sal dit die eerste prysdaling sedert Julie wees. Die verligting kos die skatkis sowat R10 miljard, wat gedek word met geld wat voorheen na die Sentrale Energiefonds geskuif is. Volgens Godongwana sal dit huishoudings se las verlig sonder dat die begroting daaronder ly.

Hoekom brandstof so duur geword het

Die brandstofprys het vanjaar soos ‘n vuurpyl die hoogte ingeskiet. Aan die kus het 95-loodvry van R19,92 in Maart tot R29,38 in Oktober gestyg, terwyl 500 dpm-diesel byna R13 per liter duurder geword het. Die konflik in die Midde-Ooste het wêreldwye oliepryse skerp opgestoot.

Die verligting duur nie lank nie

Motoriste moet egter nie te gou die vlag hys nie. Vanaf 2 Desember krimp die heffingsverlaging tot R1,50 op diesel en R1 op petrol, en op 5 Januarie 2027 verval dit heeltemal. Of die regering dit daarna sal verleng, is nog onduidelik.

Wat dit vir jou sak beteken

Wie ‘n 50-liter-tenk met diesel volmaak, kan sowat R80 per vulbeurt spaar, terwyl petrolmotoriste ongeveer R25 minder sal opdok. Dis nie ‘n fortuin nie, maar met die feesseisoen om die draai en lewenskoste wat huishoudings steeds knel, tel elke sent.

Ek het lank genoeg oorsee gewoon om te weet dat duur brandstof nie net ons probleem is nie, maar dit maak die pil nie makliker om te sluk nie. My tenk staan vandag amper leeg, maar ek wag tot Woensdag voor ek volmaak.