Huureiendom: Wie is finansieel verantwoordelik vir wat?

In ekonomies uitdagende tye, is baie huiseienaars op soek na ‘n geleentheid om ‘n huurinkomste te verdien, huurders na bekostigbare eiendomme, misdadigers na ‘n kans om ‘n rand of twee te maak en, soos altyd, Murphy op soek na ‘n kans om ‘n glips te laat gebeur. Dit werp die lig opnuut op die versekeringsverantwoordelikhede van huiseienaars, verhuurders, huurders en die regspersoon (“body corporate”). Virseker, Suid-Afrika se enigste trots-Afrikaanse versekeringsproduk, verduidelik.

Stel jou voor: Booswigte het by jou gemeubileerde en toegeruste huureiendom ingebreek en van jou besittings gesteel. Jou huis het oorstroom omdat die kompleks se regspersoon nie ‘n verstopte drein betyds herstel het nie. ‘n Huurder het bedrading verkeerd opgekoppel en dié het gelei tot ‘n brand. ‘n Pilaar in jou meenthuis is aan’t kraak, maar jy’s nie seker wie se verantwoordelikheid dit is om dit te herstel nie.

Scenarios soos hierdie gee huiseienaars en huurders gereëld koue rillings en ontaard menigmaal in ernstige geskille of selfs hofsake. Die hoofvraag: “Wie is verantwoorelik vir watter kostes?”

“Die antwoord is dat, hoewel daar ‘n paar goeie algemene riglyne vir versekeringsverantwoordelikhede is, daar baie min ‘een pas almal’ reëls is,” sê Johanni Jennings, Hoof van Virseker. “’n Spesifieke versekeringspolis of ooreenkoms wat deur twee partye onderteken is mag aansienlik van ander verskil, selfs al is hul almal heeltemal wettig. Die beste raad vir verhuurders en huurders is om die polisse en ooreenkomste deeglik na te gaan, seker te maak dat hulle dit verstaan en dat hulle deeglik voorbereid is.”

Virseker bied die volgende riglyne wanneer dit by die versekering van jou volreg-, deeltitel- of huureiendom kom:

• Eienaar-inwoner van ‘n volregeiendom: Die eienaar is verantwoordelik vir geboueversekering, huisinhoudversekering en SASRIA-dekking, wat verseker teen spesiale risiko’s soos siviele onrus, publieke wanorde, stakings, oproere en terrorisme.
• Eienaar-inwoner van ‘n deeltiteleiendom: Die eienaar is verantwoordelik vir huisinhoudversekering.

Die regspersoon is verantwoordelik vir die versekering van alle geboue en strukture, insluitend dié op die gedeelde / algemene perseel, sowel as SASRIA-dekking.

• Dis belangrik om direk by die trustees van die regspersoon of bestuursagent seker te maak watter items deur hulle spesifieke polis gedek word, aangesien dit heelwat varieer.
• ‘n Goeie basiese beginsel is dat enige iets buite jou mure en bo die plafon deur die regspersoon se versekering gedek behoort te word, tot sover dit deel vorm van die standaardkonstruksie van die eenheid en solank skade nie deur die nalatigheid van die eienaar veroorsaak is nie.
• Items wat deur die regspersoon se versekering gedek word sluit tipies geysers, pypwerk, elektriese bedrading wat gedurende die bou of opgradering van die eiendom (deur die regspersoon) aangebring is, elektriese omheining, hekmotors, gemeenskaplike fasiliteite ens in.
• Enige skade wat ‘n eienaar ly weens die onklaarraking van iets wat deur die regspersoon verseker is, nalatigheid deur die regspersoon of weens nalatigheid of foutiewe vakmanskap deur een van hulle aangestelde kontrakteurs, behoort deur die regspersoon se versekering gedek te word.
• Sou ‘n dakstruktuur byvoorbeeld meegee en waterskade veroorsaak, ‘n verstopte drein veroorsaak dat jou huis oorstroom of ‘n brand uitbreek weens foutiewe bedrading in die dak, behoort alle ander besittings wat as ‘n direkte gevolg beskadig word deur die regspersoon se versekering gedek te word.

In die geval van ‘n verhuringseiendom is die huurder verantwoordelik vir huisinhoudversekering. Waar ‘n eiendom as gemeubileerd of gedeeltelik gemeubileerd verhuur word, moet alle items wat aan die verhuurder behoort onder hulle versekering gedek word en die huurder se besittings onder hul eie versekering. Dit moet duidelik deur die verhuurder en huurder aan die betrokke versekeraars gekommunikeer word.

Alle risikoversekering is spesifiek ontwerp om alle items wat nie in ‘n versekeringspolis gespesifiseer word nie, en ook nie uitdruklik deur die polis uitgesluit word nie, te dek. Dit is ‘n wyse, bekostigbare opsie vir eienaar-inwoners, verhuurders en huurders om te oorweeg.

“Die sleutel om ‘n eiendom en die inhoud daarvan voldoende te verseker lê daarin om weg te stuur van aannames, proaktiewe huiswerk te doen en dubbel seker te maak dat jy al die feite het,” sluit Jennings af. “Met eistyd is daar min dinge erger as om te besef dat jy onderverseker was, of dat ‘n uitgawe wat jy gedink het iemand anders se verantwoordelikheid is uit jou eie sak gedelg moet word.”

Virseker is ‘n produk van Auto & General Versekeringsmaatskappy Bpk.

LEES VOLGENDE: Wanneer is die volgende openbare vakansiedag ná stemdag?