Man in Indonesië vind sy vrou dood in luislang se buik

‘n Vrou in Sentraal-Indonesië is dood in die buik van ‘n luislang gevind nadat dit haar geheel in ingesluk het, het die polisie Woensdag gesê. Dit is die tweede luislangmoord in die provinsie in ‘n maand.

Siriati (36) het vermis geraak nadat sy Dinsdagoggend haar huis verlaat het om medisyne vir haar siek kind te koop, het die polisie gesê. Die familielede het toe die polisie gevra om ‘n soektog te begin.

Haar man Adiansa (30) het haar pantoffels en broek op die grond gevind sowat 500 meter van hul huis in Siteba-dorpie, Suid-Sulawesi-provinsie.

‘BAIE GROOT BUIK’

“Hy het kort daarna ‘n slang gewaar, sowat 10 meter van die paadjie af. Die slang het nog gelewe,” het die plaaslike polisiehoof, Idul, wat soos baie Indonesiërs een naam het, aan AFP gesê.

Iyang, dorpsekretaris, het aan AFP gesê Adiansa het agterdogtig geraak nadat hy die luislang se “baie groot” maag opgemerk het. Hy het die dorpenaars geroep om te help om sy maag oop te sny, waar hulle haar lyk gekry het.

Sulke voorvalle word as uiters skaars beskou, maar verskeie mense is die afgelope jare deur luislange ingesluk.

VROU VERLEDE MAAND DOOD GEVIND

Intussen is ‘n vrou verlede maand dood gevind in die maag van ‘n luislang in ‘n ander distrik van Suid-Sulawesi.

Verlede jaar het inwoners in die provinsie ‘n luislang van agt meter, wat gevind is terwyl hy een van die boere in ‘n dorpie verwurg en geëet het, doodgemaak.

’n 54-jarige vrou is in 2018 dood gevind in ’n luislang van sewe meter in die Muna-dorp in Suidoos-Sulawesi.

En die jaar tevore het ‘n boer in Wes-Sulawesi vermis geraak voordat hy gevind is toe hy deur ‘n vier meter lange luislang by ‘n palmolieplantasie ingesluk is.

LEES VOLGENDE: Kry die Curriebeker-skedule vir die naweek hier