Twee vas na moord op bekende dokter

Twee verdagtes is in hegtenis geneem in verband mt die moord van Dr. Michael Isabelle wat tydens ʼn gewapende rooftog in sy praktyk in Dobsonville doodgeskiet is.

DR. MICHAEL ISABELLE IS VERLEDE MAAND BY SY PRAKTYK DOODGESKIET

Drie verdagtes het verlede maand by die praktyk opgedaag en voorgegee dat hulle mediese bystand vir ʼn vriend benodig.

Lees ook: Steinhoff se voormalige regshoof het vandag in die hof verskyn

Nadat die ontvangsdame hulle by die spreekkamer ingelaat het, het hulle die dokter geskiet. Die verdagtes het twee selfone gesteel waarna hulle ʼn motor op die perseel gesteel en daarin van die toneel gevlug het.

DRIE VERDAGTES HET VOORGEGEE DAT HULLE MEDIESE BYSTAND NODIG HET

Isabelle is na ʼn hospitaal geneem waar hy die volgende dag aan sy beserings beswyk het.

Volgens polisiewoordvoerder brigadier Brenda Muridili, is die twee verdagtes Saterdagoggend by hul huise in Alexandra in hegtenis geneem.

Lees ook: Paartjie se skrikwekkende ontmoeting met ‘n uitgehongerde luiperd

Muridili het bygevoeg dat Isabelle se besittings is in hul besit gevind en daar is op twee ongelisensieerde vuurwapens beslag gelê.

ISABELLE SE BESITTINGS IS IN DIE VERDAGTES SE BESIT GEVIND

“Die twee beweer dat hul makker tydens die rooftog deur die dokter geskiet is en dat hy in die motor gesterf het toe hulle van die toneel gevlug het. Hulle beweer verder dat hulle van sy liggaam ontslae geraak het en sy familie ingelig het waar om hom te kry en dat hulle die gesteelde motor agtergelaat en aan die brand gesteek het.”

Die ondersoekspan volg inligting oor die derde verdagte sowel as die voertuig op, het Muridili gesê.

Die twee verdagtes sal Maandag in die Johannesburgse landdroshof verskyn op aanklagte van moord, roof en die besit van ongelisensieerde vuurwapens en ammunisie.

Lees ook: Dokter tydens ʼn gewapende rooftog in praktyk doodgeskiet