Afgedankte burgemeester van Beaufort-Wes gaan verloofde se bewerings van aanranding betwis

Eben Botha, voormalige burgemeester van Beaufort -Wes, het sy stilswye verbreek ná bewerings dat hy sy verloofde aangerand het en gesê het hy sal die bewerings in die hof betwis.

Botha, wat lid is van die Patriotic Alliance (PA), is in September verlede jaar as die burgemeester van die munisipaliteit verkies. Hy is deur die party gedwing om te bedank nadat die bewerings aan die lig gekom het.

LEES OOK: Beurtkrag word na vlak 3 verlaag

Botha word uit sy pos as burgemeester verwyder

Terwyl die party gesê het hulle het videobewyse van die aanranding ontvang, het Botha deur sy prokureur gesê hy ontken die bewerings van aanranding ten sterkste.

Gayton McKenzie, leier van die PA, het verlede week die saak op Facebook aangespreek en gesê hulle het besluit om Botha uit die burgemeestersposisie te verwyder.

“Ek het inligting ontvang dat ons burgemeester in Beaufort-Wes meer as een keer deur sy verloofde daarvan beskuldig word dat hy haar aangerand het. Hulle het vir ons videobewyse gewys. Sy beweer dat hy haar mishandel. Ek is nie ‘n hof nie, maar dit is ons plig om vroue te verdedig en as daar enige ander vrou is wat deur ‘n lid van die PA mishandel is, moet ek weet,” het hy gesê.

LEES OOK: Malema vereis dat grond en werk so gou moontlik voorsien word

McKenzie het gesê Botha se toekoms in die PA sal afhang van die uitslag van ‘n dissiplinêre verhoor. 

“Ek het die burgemeester ontmoet, hy het eers probeer ontken, toe het hy erken hy het met sy verloofde gepraat op ‘n manier dat daar nie met ‘n vrou gepraat moet word nie. Dit is vir my duidelik as ek na die video’s kyk dat hy ‘n alkoholprobleem het. Hy ontken dat hy haar geslaan het. Ons sal hom verwyder en hy sal voor die dissiplinêre verhoor verskyn,” het hy gesê.

Die voormalige burgemeester ontken bewerings van aanranding

Botha se prokureur Winston Jansen van Jansen & Samson Prokureurs het gesê die bewerings teen die voormalige burgemeester sal in die hof getoets word.

“Ons ontken kategories elke bewering van aanranding wat teen my kliënt gemaak is. My kliënt kan nie wag om hierdie bewering in die hof te laat toets nie. Dit is niks anders as ‘n smeerveldtog teen my kliënt nie. Ons sal heftig veg om sy onskuld in ‘n geregshof te bewys,” het hy gesê.

Jansen het ook bewerings dat Botha ‘n ‘alkoholprobleem’ gehad het, ontken en gesê hy is nie ‘n swaar drinker nie. 

“My kliënt is nie ‘n swaar drinker nie. Die bewerings is ongegrond en lagwekkend om die minste te sê,” het hy gesê.