Dalk minder toue by die lisensiekantoor met tienjaarkaarte

Wie al ooit ure lank in ‘n tou by die lisensiekantoor gestaan het, sal hierdie nuus verwelkom. Die Departement van Vervoer het pas sy voorstel aan die Parlement voorgelê om bestuurslisensiekaarte vir motors en motorfietse tien jaar lank geldig te maak, in plaas van die huidige vyf jaar.

Die verandering sal geld vir kodes A, A1, B en EB, wat die meeste gewone motoriste insluit. Kaarte vir swaar voertuie, soos kodes C1, C, EC1 en EC, bly vyf jaar geldig, terwyl professionele bestuurspermitte steeds elke twee jaar hernu moet word.

Die voorstel het al ‘n lang pad gekom sedert die destydse vervoerminister Fikile Mbalula dit in 2022 aangekondig het. Die Kabinet het dit in Julie goedgekeur, en minister Barbara Creecy het dit op 17 Augustus vir openbare kommentaar gepubliseer. Nou wag daar net nog finale Kabinetsgoedkeuring en die afkondiging in die Staatskoerant voordat dit amptelik in werking tree.

Minder druk op ‘n stelsel wat kreun

Volgens die departement moet die langer geldigheidstydperk die druk op die hernuwingstelsel verlig en die berugte agterstande verminder. Die Staatsdrukkery is ook betrek om kaartproduksie te versterk, en motoriste wie se kaarte verval terwyl hulle op ‘n nuwe een wag, sal tot drie maande lank steeds wettig kan bestuur.

Die oogtoets bly steeds

Die departement beklemtoon wel dat niemand ‘n vrypas kry nie. Wanneer jy ‘n nuwe kaart aanvra, moet jy steeds ‘n oogtoets aflê en verklaar dat jy nie gediskwalifiseer is nie. Daarby kan die prys van hernuwing verander, aangesien die minister ‘n nuwe prysmodel vir die langer kaarte laat opstel het.

Afskeid van die ou papierkaart

Die ou gelamineerde papierkaart sal mettertyd ook vervang word, en ‘n komiteelid in die Parlement het aangedring op ‘n duidelike plan vir veilige digitale bestuurslisensies. Ek het intussen net een versoek: my volgende lisensiefoto moet asseblief beter uitkom, want ek gaan dit tien jaar lank in my beursie ronddra.