Dwelms van miljoene rande is in trekker gevind

Kokaïen ter waarde van R8 miljoen is versteek gevind in ʼn trekker wat in ʼn nywerheidspark naby Pietermaritzburg, KwaZulu-Natal, gestaan het.

DIE DWELMS IS VERSTEEK IN DIE TREKKER IN KZN GEVIND

Volgens Valke woordvoerder lt.kol. Simphiwe Mhlongo, is daar inligting ontvang oor ʼn vragmotor wat ʼn trekker van Durban se hawe na die Vrystaat moes vervoer.

Die betrokke trekker word glo gebruik vir die bespuiting van gewasse met gifstowwe.

LEDE VAN DIE VALKE HET INLIGTING OPGEVOLG

Mhlongo sê lede van die Valke het die inligting opgevolg en die vragmotor in die nywerheidspark aangetref.

Lees ook: Veroordeelde kaper, smokkelaar kry 53 jaar tronkstraf

“Daar is op 20 pakke kokaïen afgekom wat in ʼn houer op die trekker versteek was.”

NIEMAND IS NOG IN HEGTENIS GENEEM NIE

Hy sê ʼn verklaring is van die bestuurder verkry en niemand is nog in dié stadium in hegtenis geneem nie.

Mhlongo het bygevoeg die ondersoek duur voort.

DIE ONDERSOEK DUUR TANS VOORT

Genl.maj. Lesetja Senona, provinsiale hoof van die Valke, het die beslaglegging verwelkom en die betrokke lede vir hul werk geloof.

In ander nuus, is die veroordeelde kaper, smokkelaar, Sipho “Smirnoff” Mhlanga onlangs saam met sy makkers by die Ingwavuma-landdroshof gevonnis.

Hy is 53 jaar tronkstraf opgelê vir aanklagte van onder meer moord, roof met verswarende omstandighede en ontvoering.

SMIRNOFF IS IN 2023 IN HEGTENIS GENEEM

Die 37-jarige is verbind met ‘n kapingssindikaat wat gesteelde voertuie van Suid-Afrika na Mosambiek smokkel.

Tot op hede het die taakspan wat in Februarie 2023 ontplooi is 276 verdagtes gearresteer.

HY IS OOK VERBIND MET ‘N KAPINGSSINDIKAAT

Tot 150 gesteelde of gekaapte voertuie is teruggevind en ongeveer 135 daarvan is aan hul wettige eienaars terugbesorg.