Elon Musk sê pasiënt beweeg rekenaarmuis met breininplanting

Elon Musk sê die eerste menslike pasiënt met ‘n breininplanting van sy Neuralink-onderneming is in staat om ‘n rekenaarmuis met denke te beweeg.

Musk se neurotegnologiemaatskappy het verlede maand ‘n breininplanting in sy eerste menslike pasiënt geïnstalleer en Musk het Maandag berig die eksperiment was ‘n sukses.

“Dit lyk of die pasiënt ‘n volle herstel gemaak het sonder enige nadelige gevolge,” het Musk gesê in ‘n onderhoud wat op X, voorheen Twitter, gestroom is.

Die pasiënt is in staat om “die muis op die skerm te beweeg net deur te dink,” het Musk gesê.

“Ons probeer om soveel moontlik knoppies te druk deur middel van denke,” het Musk bygevoeg.

“Jy wil natuurlik meer as net twee knoppies hê.”

LEES: Dele van Tshwane sonder krag ná hewige storms

Elon Musk is nie die enigste een wat vordering in die veld probeer maak nie

Neuralink se tegnologie werk deur ‘n toestel omtrent die grootte van vyf gestapelde munte wat deur indringende chirurgie in die menslike brein geplaas word.

Die onderneming, wat in 2016 deur Musk gestig is, het ten doel om direkte kommunikasiekanale tussen die brein en rekenaars te bou.

Die ambisie is om menslike vermoëns te versterk, neurologiese afwykings soos ALS of Parkinson’s te behandel, en miskien eendag ‘n simbiotiese verhouding tussen mense en kunsmatige intelligensie te bereik.

Elon Musk is skaars alleen in die poging om vooruitgang te maak in die veld, wat amptelik bekend staan as brein-masjien- of brein-rekenaar-koppelvlaknavorsing.

Die magnaat, wat met vertragings getref is, het glo uitgereik om kragte saam te snoer met die inplantaatontwikkelaar Synchron.

Die Australië-gebaseerde Synchron het sy eerste toestel in Julie 2022 by ‘n Amerikaanse pasiënt ingeplant.

Deur Garrin Lambley © Agence France-Presse