Limpopo: 45 gemeentelede op pad na Moria sterf in busongeluk
’n Busbestuurder wat gemeentelede van Botswana na Moria vervoer het, het glo beheer verloor op R518 in Limpopo en 45 mense is dood.
Die Minister van Vervoer, Sindisiwe Chikunga, het meegevoel gestuur aan die families van die 45 mense wat in ‘n ongeluk op die R518 naby Mamatlakala op pad na Moria in Limpopo dood is.
’n Bus wat gemeentelede van Botswana na Moria vervoer het, het op Donderdag, 28 Maart van ’n brug afgeval, neergestort en aan die brand geslaan.
Volgens die departement van vervoer is 45 mense op slag dood, terwyl een persoon ernstig beseer is.
Die enigste oorlewende is glo ‘n agtjarige.
Na die ongeluk het Chikunga gesê hul gedagtes en gebede is by die gesinne wat geraak is gedurende hierdie moeilike tyd.
“Ons gaan voort om te alle tye verantwoordelike bestuur aan te moedig met verhoogde waaksaamheid, aangesien meer mense hierdie Paasnaweek op ons paaie is,” het Chikunga gesê.
“Die SAPD gaan voort om opdaterings te verskaf soos die redding- en herstelpogings ontvou. Daar word beweer dat die bestuurder beheer verloor het en teen versperrings op die brug gebots het, wat veroorsaak het dat die bus oor die brug gegaan en die grond getref het, waar dit aan die brand geslaan het.
“Die Minister verseker die publiek dat die presiese oorsaak van die ongeluk deeglik ondersoek word,” het Collen Msibi, woordvoerder van die departement van vervoer, gesê.
Die Suid-Afrikaner is opsoek na joernaliste …. Indien jy belangstel stuur asb. ‘n e-pos aan info@thesouthafrican.com of WhatsApp ons op 060 011 0211.
