Suid-Afrika groet Babsy Mlangeni, die stem agter Sala Emma

Suid-Afrika het ‘n ware musieklegende verloor. Bernard “Babsy” Mlangeni, die sanger, kitaarspeler en liedjieskrywer agter tydlose treffers soos Sala Emma, is op Donderdag 1 Oktober ná ‘n kort siekbed oorlede. Hy was 83. Sedertdien stroom die huldeblyke in van aanhangers, mede-musikante en selfs die regering, wat almal sy unieke stem en nalatenskap eer.

Mlangeni is in 1943 in Orlando-Oos, Soweto, gebore en het op driejarige ouderdom sy sig verloor. Dit het hom egter nie gekeer nie. Hy het later die Athlone-skool vir Blindes in Bellville bygewoon, waar hy kitaar leer speel het.

Dié groep se klank het gehelp om township soul, of Suid-Afrikaanse soul, te vorm, met Mlangeni as hoofsanger. Omdat hy in isiZulu, Sesotho en isiXhosa gesing het, kon sy musiek maklik oor taal- en kultuurgrense heen beweeg. Dis seker hoekom soveel Suid-Afrikaners sy liedjies vandag nog woord vir woord ken.

‘n Liefdeslied wat bly hang het

Mlangeni se naam sal altyd aan Sala Emma gekoppel word, die treffer uit die sestigerjare wat hy vir sy vrou, Emma, geskryf het. Die twee is in 1968 getroud, en sy oorleef hom saam met hul kinders, kleinkinders en agterkleinkinders. Klassieke soos Bua Nnete en Botsotso het sy plek in ons musiekgeskiedenis verseker.

Kunsteminister Gayton McKenzie het Mlangeni as ‘n musiekreus en pionier beskryf wie se stem deel van die land se klankbaan geword het. Sy sukses het ook persepsies uitgedaag oor wat mense met gestremdhede kan bereik, en hy het jonger kunstenaars soos wyle Steve Kekana onder sy vlerk geneem.

Die musiek speel voort

Die lys van Suid-Afrikaanse musieklegendes wat ons die afgelope paar jaar verloor het, word al hoe langer, en elke keer maak dit weer seer. Ek gaan vanaand Sala Emma hard opsit, en ek vermoed ek sal nie die enigste een in die land wees wat saamsing nie.