Morne Morkel bedank as boulafrigter van Pakistan

Die boulafrigter, Morne Morkel, het Maandag die eerste man geword om Pakistan se agterkamerpersoneel te bedank ná die span se uittrede uit die Krieketwêreldbeker in Indië.

Die Pakistanse Krieketraad (PCB) het gesê die 39-jarige het sy bedanking ingedien.

“Morkel het bedank as die boulafrigter van die Pakistan-manspan,” het ‘n PCB- verklaring gesê.

“Hy het in Junie vanjaar ’n kontrak van ses maande gekry.”

PCB het gesê sy plaasvervanger sal aangekondig word voor die span se drie-toets-toer na Australië wat volgende maand begin.

Pakistan se spandirekteur, Mickey Arthur, het aan AFP gesê Morne Morkel het sy kort tydjie in die pos geniet.

LEES: Die Wildekus: Drie spesiale plekke wat jy moet besoek

“Morne was net tot Januarie 2024 gekontrakteer, maar sy werk met ander ligas laat ongelukkig nie meer tyd toe nie,” het Arthur gesê.

“Hy was mal oor sy tyd by ons en is baie hartseer dat hy nie kan voortgaan nie.”

Pakistan het Saterdag uit die Wêreldbeker-toernooi geval ná ‘n nederlaag van 93 lopies teen Engeland in Kolkata, en kon nie die halfeindronde haal met vyf nederlae en vier oorwinnings nie.

Skipper Babar Azam en Arthur is ook onder skoot vir die swak vertoning van ‘n span wat voor die toernooi as die wêreld se voorste eendagspan aangewys is.

LEES: SAL vebeter reiservaring met OR Tambo se nuwe sitkamer

Dit is die vyfde keer in die laaste ses Wêreldbeker-toernooie dat Pakistan nie die halfeindronde kon haal nie.

Arthur se kontrak as hoofafrigter is nie hernu ná Pakistan se mislukte veldtog in 2019 nie. Hy is terug in ‘n tweede tydperk, hierdie keer as spandirekteur.

Deur Garrin Lambley © Agence France-Presse