SA Rugby betreur die tragiese heengaan van oud-Springbok

SA Rugby-president Mark Alexander het hulde gebring aan die voormalige Springbokkaptein Theuns Stofberg, wat ongelukkig Woensdag oorlede is.

Stofberg, wie se volle naam Marthinus Theunis Steyn Stofberg is, is Woensdagoggend dood ná ‘n ernstige motorongeluk Dinsdag buite Stellenbosch. Hy was 68.

LEES OOK: Swaar vonnisse vir Babita Deokaran se ses moordenaars

Stofberg, wat op 6 Junie 1955 gebore is, was die kaptein in vier van sy 21 toetse tussen 1976 en 1984, insluitend die eerste toets op die berugte 1981-toer na Nieu-Seeland, en het altesaam ses toetsdrieë gedruk.

Stofberg het die Curriebeker gewen in die kleure van drie verskillende spanne – die Cheetahs (1976), Bulle (1979, ’80) en Westelike Provinsie (1982, ’83) – ‘n onderskeiding wat hy alleen behaal het totdat die huidige Springbok-agtsteman Duane Vermeulen die prestasie geëwenaar het.

SA RUGBY SE HULDEBLYK

“Om te sê Theuns Stofberg het ‘n geweldige impak op Suid-Afrikaanse rugby gemaak in ‘n moeilike tyd in die rugbygeskiedenis, sal nie genoeg wees nie,” het mnr. Alexander gesê.

“Hy het sy eerste teen die All Blacks in 1976 gespeel, slegs ‘n jaar nadat hy vir die SA O21’s gespeel het, en het in al vier toetse in die reekssege oor die Britse en Ierse Leeus in 1980 gespeel.

“Theuns was in 1981 lid van die Bok-groep wat in baie uitdagende omstandighede na Nieu-Seeland getoer het, en hy het sy toetsloopbaan op die ouderdom van 29 afgesluit deur die Bokke teen Engeland in die twee toetse in Suid-Afrika in 1984 te lei.

“Om die Curriebeker net een keer te lig is ‘n hoogtepunt in baie se loopbaan, maar Theuns het dit vyf keer met drie verskillende provinsies gedoen, wat ‘n wonderlike prestasie is. Hy was ‘n nederige en hardwerkende rugbyspeler wat op flank en slot uitgeblink het en die Bokke in albei posisies verteenwoordig het.

“Theuns het ‘n diep liefde vir rugby gehad, hy het die etos en kameraadskap van die spel waardeer, en hy het verseker dat hy en sy voormalige spanmaats oor die jare in kontak bly.

“Hy was regoor die wêreld gerespekteer en was ‘n wonderlike ambassadeur vir Suid-Afrika. Ons gedagtes en gebede is met sy vrou, Martie, hul vier kinders, Elni, Theunis, Johan en Anzél en hul eggenote, hul kleinkinders, ander familie en vriende in hierdie moelike tyd.”

LEES OOK: Rassie Erasmus oorweeg dit om SA Rugby te verlaat

OPSOMMING VAN SY LEWE

Afgesien van sy 21 toetse, het Stofberg van 1976 tot 1985 in ’n verdere agt middelweekwedstryde vir die Bokke, asook 117 provinsiale wedstryde in die kleure van die Cheetahs (41), Bulle (33) en Westelike Provinsie (43) gespeel. Hy het ook vir die SA o.21’s, die Gazelles, die SA XV en Barbarians-spanne gespeel en ‘n ongelooflike 64 drieë in sy 179 eersterangse verskynings gedruk.