Jacques Nienaber genomineer vir Wêreldrugby-toekenning

Die Springbokafrigter Jacques Nienaber, die slot Eben Etzebeth en die losskakel Manie Libbok is genomineer vir die 2023 Wêreldrugby-toekennings, wat Sondag 29 Oktober by die Opéra Garnier in Parys oorhandig word – ‘n dag ná Saterdag se Wêreldrugby- eindstryd by die Stade de France.

Nienaber is op die lys vir die Wêreldrugby-afrigter van die Jaar- toekenning, terwyl Etzebeth en Libbok onderskeidelik in die kategorieë Wêreldrugby Mans 15-speler van die Jaar en Wêreldrugby Mans 15 Deurbraakspeler van die Jaar benoem is.

Eben Etzebeth is ook gekies vir die Wêreldrugby Mans 15 Droomspan.

LEES OOK | Die skokkende pryse van die 2023 Rugby Wêreldbeker-eindstrydkaartjies

Nienaber, wat in 2020 die rol as Springbok-hoofafrigter aangeneem het nadat hy as hulpafrigter vir Rassie Erasmus gedien het, wat ná die span se seëvierende 2019 Rugbywêreldbeker-veldtog in Japan van Springbok-hoofafrigter na SA Rugby Direkteur van Rugby verander het, gaan teen Ian Foster (Nieu-Seeland), Andy Farrell (Ierland) en Simon Raiwalui (Fidji) vir die wêreld se mees gesogte afrigtingstoekenning kompeteer.

Etzebeth, wat tans die derde mees bekroonde Springbokspeler van alle tye is met 118 toetspette, is saam met Bundee Aki (Ierland-senter), Antoine Dupont (Frankrykse skrumskakel en kaptein) en Ardie Savea (Nieu-Seeland losvoorspeler) genomineer vir die Speler van die Jaar-toekenning.

Manie Libbok verskyn op ‘n opwindende lys benoemdes vir Deurbraakspeler van die Jaar saam met Louis Bielle-Biarrey (Frankrykse vleuel), Mark Tele’a en Tamaiti Williams (onderskeidelik Nieu-Seelandse vleuel en stut).

MOET LEES | Hoe om die herverkoopwaarde van jou motor te verbeter

“Ons wil graag vir Jacques, Eben en Manie gelukwens met die benoeming vir hierdie gesogte toekennings en ons wens hulle sterkte toe vir die toekenningseremonie,” het SA Rugby President, Mark Alexander, gesê.

“Hierdie toekennings gee erkenning aan die beste afrigters en spelers ter wêreld, en om benoemdes in drie kategorieë te hê is ‘n bewys van die klas van ons afrigters en spelers in Suid-Afrika.

“Ek wil ook van hierdie geleentheid gebruik maak om die Springbokke sterkte toe te wens vir die Rugby Wêreldbeker-eindstryd teen Nieu-Seeland Saterdag by die Stade de France. Dit is ‘n massiewe eer om jou land op die grootste verhoog in wêreldrugby te verteenwoordig en almal by SA Rugby en die hele nasie is agter julle. Ons het volle geloof in julle om aan te hou om die land hoop te gee en glimlagte op mense se gesigte te sit.”

LEES: Sewe feite oor die Springbokke se 2007 Wêreldbekerrugby-oorwinning