Australiese polisie gaan voort met soektog van man wat deur haai aangeval is

Die polisie in Suid-Australië was vroeg Woensdag op soek na die liggaam van ‘n branderplankryer wat vermoedelik in ‘n “grusame” haai-aanval dood is.

Die 55-jarige man het Dinsdagoggend naby die gewilde branderplankryplek Granites Beach in Suid-Australië verdwyn, het die polisie gesê.

“Die man se lyk moet nog gevind word en die soektog is vroeg vanoggend hervat.”

Getuie Ian Brophy het gesê hy het gesien hoe ‘n haai “net wegspring en byt”, die man onder die water sleep, met “bloed oral”.

LEES: Einde van skelmritte? Metrobus stel 24 roete-inspekteurs aan

“Ek het hom in die golf gesien en die haai het sy lyf in sy mond gehad – dit was nogal grusaam,” het hy aan die plaaslike koerant The Advertiser gesê.

Brophy het gesê dat, binne ‘n paar minute, al wat oorgebly het, was die slagoffer se branderplank.

“(Die haai) het elke stukkie van hom gevreet, dink ek.”

Jeff Schmucker was deel van diegene wat nooddienste gehelp soek het na die branderplankryer.

Hy het aan die nasionale uitsaaier ABC gesê die haai was “die lengte van ’n sedanmotor” maar hy kon nie seker wees of dit vir die aanval verantwoordelik was nie.

Dit is bekend dat grootwithaaie volop is langs Suid-Australië se kuslyn. ‘n Onderwyser is ook in Mei sowat 120 km van die plek van Dinsdag se aanval deur ‘n haai aangeval.

Deur Garrin Lambley © Agence France-Presse