Besonderhede oor die sonkragooreenkoms met China – MASSIEF vir SA
Die minister hoop om ‘n sonkragooreenkoms met China te finaliseer by hierdie week se BRICS-beraad, wat die begin van die einde van beurtkrag kan beteken.
‘n Groot sonkragooreenkoms met China is in die werke en dit sal waarskynlik hierdie week by Brics onderteken word, berig Business Tech. Die minister van elektrisiteit, Kgosientsho Ramokgopa, het met Bloomberg TV bevestig dat hy naby daaraan is ‘n groot sonkragooreenkoms met China te onderteken.
LEES OOK: Pad na die RWB | Springbok-spelerprofiel: Trevor Nyakane
Die sonkragooreenkoms met China sal Suid-Afrika help om toegang tot sonpanele en ander tegnologie te kry wat nodig is om die voortslepende energiekrisis aan te pak. China is die wêreld se mees produktiewe vervaardiger van sonpanele. Die minister sê aansienlike belegging en energieopwekking word binne net ses maande verwag.
BEURTKRAG SE EINDE IN SIG?
As ‘n voorloper van die sonkragooreenkoms met China, het die minister na die Ooste gereis om met die grootste sonpaneelvervaardigers te vergader. Hy is vol vertroue dat hierdie ooreenkoms sal help om Eskom se swak infrastruktuur reg te stel. En beurtkrag sal uiteindelik iets van die verlede word.
Ramakgopa het voorspel dat ‘n bykomende 4 700 MW krag in die volgende paar maande by die netwerk gevoeg sal word. In reaksie op aanhoudende beurtkrag het Suid-Afrikaanse besighede en private huishoudings toenemend in sonkrag begin belê. SA het tot dusver in 2023 meer as R12 miljard se sonkragtegnologie ingevoer.
En soos ons vroeër die maand berig het, word Suid-Afrika se plan vir hernubare energie – ter waarde van R160 miljard – deur van die wêreld se rykste lande gefinansier om ons van steenkool weg te beweeg. Maar vertragings het plaasgevind as gevolg van die behoefte om werkers her op te lei, asook ‘n gebrek aan toerusting.
LEES OOK: Hildegard Steenkamp het vir 13 jaar elke sekonde een rand gesteel
Die ondertekening van hierdie sonkragooreenkoms met China sal na verwagting hierdie week by die BRICS-beraad plaasvind.
Die 15de BRICS-beraad vind vanaf 22-24 Augustus 2023 by die Sandton-konvensiesentrum plaas.
Die Suid-Afrikaner is opsoek na joernaliste …. Indien jy belangstel stuur asb. ‘n e-pos aan info@thesouthafrican.com of WhatsApp ons op 060 011 0211.
