Meer as R25 miljoen losprys vir ontvoerde sakeman van Gqeberha
Daar is glo ’n massiewe lospryseis gemaak vir die veilige terugkeer van die ontvoerde Gqeberha-sakeman Neal Ah-Tow.
Die afgelope naweek het dit aan die lig gekom dat Neal Ah-Tow, sakeman van Gqeberha, buite sy vissery ontvoer is toe hy Vrydagoggend vroeg op die punt was om sy winkel oop te maak.
Volgens die Suid-Afrikaanse polisiediens is “SAPD Algoa Park-speurders steeds op soek na ‘n Gqeberha-sakeman, Neal Ah-Tow (58) wat Vrydagoggend, 01 Maart 2024, buite sy vissery in Crichtonstraat in Sidwell ontvoer is. Hy is deur vyf gewapende mans in ’n silwer Chev Cruz-voertuig gedruk.”
Dit word nou deur AlgoaFM berig dat kaptein Yolisa Mgolodela, Valke-woordvoerder, bevestig het dat ‘n losprys-eis Dinsdagoggend ontvang is teen ‘n bedrag van 1,4 miljoen Amerikaanse dollar (sowat R26,7 miljoen).
Mgolodela het bygevoeg dit impliseer dat die verdagtes buitelandse burgers kan wees.
Polisie pleit vir hulp om die ontvoerde Gqeberha-sakeman Neal Ah-Tow op te spoor
Die SAPD het die volgende boodskap op Facebook geplaas: “Die polisie doen ‘n beroep op enigiemand wat van enigiets met betrekking tot hierdie voorval weet of kan help om hom op te spoor, om SAPD Algoa Park, D/WO Errol Kleinhans te kontak by 083 243 4567 of Crime Stop by 08600 10111 of maak gebruik van die My SAPS-toepassing om inligting te stuur.”
Intussen ondersoek Saps Algoa Park se speurders ‘n saak van ontvoering , maar het nog geen leidrade gerapporteer om meer insig te verkry oor Ah-Tow se verblyfplek nie.
Die Suid-Afrikaner is opsoek na joernaliste …. Indien jy belangstel stuur asb. ‘n e-pos aan info@thesouthafrican.com of WhatsApp ons op 060 011 0211.
