Minister mik vir strenger uitvoerwette ná beesskipdebakel in Kaapstad

Minister van Landbou, Landelike Ontwikkeling en Grondhervorming, Thoko Didiza, het planne aangekondig om regulasies oor die uitvoer van lewende diere te verskerp, in antwoord op ‘n parlementêre vraag.

Dit volg op die gebeure in Kaapstad verlede maand toe ‘n vieslike reuk die stad verswelg het. Die bron van die reuk het gekom van 19 000 beeste, wat in “bedreikende omstandighede” aangehou is, aan boord van ‘n skip in die Kaapstadse hawe.

Die beeste is vanaf Brasilië na Irak aan boord van ‘n Al Koeweit-vaartuig verskeep.

Volgens Didiza het ‘n Suid-Afrikaanse maatskappy namens hul klant opgetree. Die maatskappy het die departement gevra om die skip toe te laat om 2 000 ton veevoer te laai.

Didiza het gesê dat alle nodige prosedures gevolg is om risiko’s van kontaminasie te verminder.

Beesskip veroorsaak aaklige reuk in Kaapstad

Die slegte reuk het ‘n amptelike ondersoek van stapel gestuur, wat inspeksies deur dierewelsyngroepe ingesluit het.

Die Vereniging vir die Voorkoming van Wreedheid teenoor Diere (DBV) het die “betreurenswaardige toestande” aan boord van die skip uiteengesit. Hierdie toestande het veroorsaak dat sommige beeste gevrek het, terwyl ander beserings opgedoen het.

Didiza het gereageer op ‘n parlementêre navraag van Tamarin Breedt, lid van die Vryheidsfront Plus, skryf IOL.

Breedt het gevra of die bestaande riglyne vir die uitvoer van lewende diere per see voldoende is. Sy het ook gevra wanneer die publiek kan verwag dat hierdie regulasies toegepas sal word.

“Wat die gevalle van uitvoere uit Suid-Afrika betref, dien die huidige wette, standaarde en internasionale norme en standaarde wat vir die uitvoer van lewende diere uit die Republiek gebruik word, reeds om versekering vir dierewelsyn te verskaf,” het Didiza in reaksie gesê.

“Die departement werk egter daaraan om die regulatoriese raamwerk te versterk deur regulasies vir die uitvoer van diere per see in te stel.”

Nuwe uitvoerwette

Didiza het gesê dat ‘n eerste konsep van die voorgestelde regulasies teen die einde van April 2024 afgehandel sal wees.

Dit sal gevolg word deur ‘n proses wat ‘n sosio-ekonomiese impakbeoordeling sal insluit. Dit sal ook openbare konsultasie en hersiening van die terugvoer voor finalisering behels.

Die ministerie het gesê die uiteindelike doel is om bestaande skuiwergate in die stelsel toe te maak, en seker te maak dat vaartuie wat in Kaapstad of ander hawens dok, by die nuwe regulasies hou.

“Sodra die proses afgehandel is, sal die dokument aan die Minister voorgelê word vir oorweging en promulgering. Daar word voorsien dat die tweede deel van die proses in die tweede kwartaal van die volgende finansiële jaar afgehandel sal word,” het Didiza bygevoeg.

LEES: Limpopo: 45 gemeentelede op pad na Moria sterf in busongeluk