weerlig tref seun
'n Seun (13) sterf nadat weerlig hom tref. Foto's: X/@ZANewsFlash

Tuisblad » Nuus » Seun (13) sterf op motorfiets in KZN nadat weerlig hom tref

Seun (13) sterf op motorfiets in KZN nadat weerlig hom tref

’n 13-jarige seun, Nathan Vorster, is dood nadat hy in Glencoe naby Dundee in KwaZulu-Natal deur weerlig getref is.

22-12-23 18:59
weerlig tref seun
'n Seun (13) sterf nadat weerlig hom tref. Foto's: X/@ZANewsFlash

’n 13-jarige seun is dood nadat hy Maandag deur weerlig in Glencoe naby Dundee in KwaZulu-Natal getref is.

Die storm, wat Dundee en die omliggende gebiede Maandagaand getref het, het 45 minute geduur en nog ses mense beseer.

LEES OOK: Die mees visumvriendelike lande in Afrika in 2023

‘n Spoor van verwoesting is ook op plekke binne die Umgungundlovu-distriksmunisipaliteit (Pietermaritzburg en afgeleë gebiede) gelaat.

DIE DONDERSTORM HET 45 MINUTE GEDUUR

Volgens berigte deur die KwaZulu-Natalse Sentrum vir Rampbestuur het die donderstorm 45 minute geduur.

Maroela Media het die slagoffer uitgeken as die 13-jarige Nathan Vorster, ‘n leerder by Dundee Junior School. Die Middelburg Stoeiklub het in ‘n plasing op Facebook HUL innige simpatie en meegevoel met die Vorster-familie betuig.

Luidens die berig was Nathan ‘n stoeier by die North Natal Rhinos stoeiklub.

Nathan het glo op sy motorfiets gery toe weerlig hom getref het.

LEES OOK: Tien olifante ontsnap uit Ithala Wildreservaat

Nog ses mense is beseer toe dakke en mure ineengestort of daarop geval het. Sommige slagoffers is na ‘n hospitaal gehaas, terwyl ander behandeling by die huis ontvang het.

SES ANDER MENSE IS BESEER

Die woordvoerder van die KwaZulu-Natalse departement van samewerkende regering en tradisionele sake het gesê verskeie huise in die nedersetting is oorstroom en omgevalle bome het paaie versper.

“’n Voorlopige beoordeling van die skade dui daarop dat 173 huise beskadig is, wat 1 211 mense raak. Besighede is ook beskadig en omliggende boere het vee en oeste verloor.”

het KwaZulu-Natal se departement van samewerkende regering en tradisionele sake gesê.

Skade is ook aangeteken in gebiede onder die beheer van die Umgungundlovu-distriksmunisipaliteit. Enkele huise is beskadig, maar geen beserings of sterftes is tot dusver aangemeld nie.

NOG DONDERSTORMS WORD IN VERSKEIE DELE VAN SA VERWAG

Intussen het die Suid-Afrikaanse Weerdiens Woensdag nog reën en donderstorms voorspel vir dele naby die Drakensberge, asook Kokstad en Pietermaritzburg.

’n Geel vlak 2-waarskuwing vir erge donderstorms, hael, sterk winde en kitsvloede is uitgereik vir dié dele, asook Gauteng en dele van Mpumalanga en Noordwes.

Rampbestuurspanne van die plaaslike regering het komberse, matrasse en kospakkies by die geaffekteerde gebiede van KwaZulu-Natal afgelewer.

GEAFFEKTEERDE GESINNE ONTVANG HULP

Bongiwe Sithole-Moloi, LUR vir samewerkende regering en tradisionele sake in die provinsie, het gesê rampbestuurspanne sal voortgaan om geaffekteerde gesinne by te staan.

“Ons is diep bekommerd oor die voortdurende verwoestende reën in ons provinsie, wat ‘n kommerwekkende aanduiding is van aardverwarming.”

Sy het inwoners aangemoedig om ag te slaan op weerwaarskuwings en na veiliger gebiede te beweeg wanneer hulle aangesê word om dit te doen.