VIDEO: Tornado tref Tongaat in KwaZulu-Natal

’n Tornado het Maandagmiddag Tongaat aan die KwaZulu-Natalse Noordkus getref en groot skade aangerig.

IPSS-nooddienste het gesê sy mediese en soek-en-reddingspanne is na die gebied ontplooi ná berigte van ‘n tornado in die gebied.

Ten tyde van publikasie is dit onduidelik of daar sterftes was.

Intussen het die eThekwini Munisipaliteit die publiek versoek om kennis te neem van ‘n weerwaarskuwing wat deur die Suid-Afrikaanse Weerdienste (SAWD) uitgereik is.

Die munisipaliteit het gesê die voorspelling is vir aanhoudende swaar reënval oor die provinsie insluitend die eThekwini-streek.

“Hierdie vlak 4-waarskuwing kan lei tot oorstromings van paaie en nedersettings, skade aan infrastruktuur, en vernietiging van modder-gebaseerde huise. Hoër reënintensiteite word verwag langs die kusstreke van eThekwini.

“Motoriste word versoek om uiters versigtig te wees en ‘n veilige volgafstand te handhaaf terwyl hulle op nat paaie ry. Voorspellings toon ‘n hoë waarskynlikheid van matige tot hoë reënval tussen vandag middag, en 23:00 vanaand,” het die munisipaliteit gesê.

Die munisipaliteit het inwoners ook aangeraai om versigtig te wees, om binnenshuis te bly indien moontlik, te vermy om te reis tensy dit absoluut noodsaaklik is en om nie te probeer om riviere en strome oor te steek nie.

LEES VOLGENDE: Wat is die wet rondom ‘n koalisieregering in SA?