Wat om te doen as jy die SAID geld skuld ná eFiling

Die 2023-belastingseisoen is sedert 7 Julie 2023 oop vir individuele belastingbetalers. Die sperdatum is 23 Oktober 2023 . Maar wat as jy, nadat jy jou belastingopgawe voltooi het, in plaas van ‘n terugbetaling, in kennis gestel word dat jy die SAID skuld? Hoe het dit gebeur en wat kan jy doen?

JY SKULD SAID. WAT NOU?

Miskien het jy jou syfers verkeerd bereken, of jy het eenvoudig nie opgelet deur die jaar nie, maar as jy ‘n bedrag het wat jy moet vereffen en jy skuld die SAID, beteken dit jy het deur die jaar belasting op jou inkomste onderbetaal.

LEES OOK: Drie verdagtes in hegtenis geneem vir onwettige mynbou

Volgens die kenners by TaxTim kon dit dalk gebeur het as jy gedurende die belastingjaar vir twee of meer werkgewers gewerk het. Een of meer van die werkgewers het dalk LBS (Betaal-Soos-Jy-Verdien)-belasting teruggehou van die salaris wat hulle aan jou betaal het.

Dit is eenvoudig, as ‘n werkgewer onbewus is van jou totale salaris (al jou inkomste saam), trek hulle dalk nie soveel belasting af soos wat hulle moet nie. Jy word nie genoeg belas nie en aan die einde van die jaar skuld jy die SAID.

REISTOELAAG

Dit is nie ongewoon dat mense met ‘n reistoelaag van die werk af onderbelas word nie. 80% van jou reistoelaag is onderhewig aan maandelikse LBS-belasting. As jou totale besigheids kilometers egter te laag is – minder as 20% van jou totaal – kan jy die SAID skuld.

TaxTim meen as jou werksituasie verander en jy minder ry, moet jy jou reëling verander, anders kan dit jou kos. Verder, as jy vir werk reis en nie konsekwente, akkurate rekords van jou reise hou nie, kan jy onderbelas word en weereens die SAID skuld.

VERDIEN EKSTRA INKOMSTE

Daar is baie maniere waarop mense wettiglik ‘n bietjie ekstra kan verdien, en in hierdie ekonomie moet ons almal soveel verdien as wat ons kan. Of dit nou van ‘n pensioentoelaag, werkloosheidsfondsuitbetaling, of die uitverhuur van eiendom/toerusting (wat jy op jou inkomstebelastingopgawe moet verklaar) of rente op beleggings is. As jy min tot geen belasting hierop betaal het – raai wat – jy skuld die SAID.

TaxTim herinner ons daaraan dat as jy inkomste uit ‘n belegging verdien, daar ‘n belastingvrye drempel is. As jy onder die ouderdom van 65 is, is die eerste R23 800 se rente belastingvry, ouer as 65 jaar is R34 500. As jy nie genoeg belasting op jou beleggingsinkomste betaal het nie, kan jy die SAID skuld.

30 DAE OM TE BETAAL

As dit blyk dat jy die SAID skuld nadat jou belastingopgawe ingedien is, sal die betaaldatum op jou Kennisgewing van Aanslag (ITA34) wys. Oor die algemeen is betaling betaalbaar 30 dae nadat die aanslag uitgereik is.

Moenie vergeet nie, die sperdatum vir inkomstebelasting indiening is 23 Oktober 2023 .

Hierdie artikel is slegs vir inligtingsdoeleindes en moet nie as finansiële, belasting- of regsadvies beskou word nie. Vir verdere besonderhede raadpleeg die SAID-webwerf of kontak ‘n belastingspesialis.

KLIK HIER OM MEER ARTIKELS VAN RAY LEATHERN TE LEES