Luislang maak geliefde polisiehond in hok dood

‘n Luislang het die polisiehond Bina, ʼn Belgiese herdershond, in haar hok Saterdag by die Lephalale-honde-eenheid doodgemaak.

LUISLANG MAAK GELIEFDE POLISIEHOND IN HOK DOOD

Provinsiale polisiewoordvoerder kol. Malesela Ledwaba sê Bina was sewe jaar oud en is by die polisie se hondeskool by Roodeplaat as dwelmsnuffelhond opgelei.

“Sy het haar bewys as een van die uitblinkers by die polisie se Lephalale-honde-eenheid en het gehelp met die oplos van dwelmverwante sake in die provinsie,” het Ledwaba gesê.

BINA HET KORT VOOR HAAR DOOD GEHELP OM VERDAGTES MET DWELMS VAS TE TREK

Bina het kort voor haar dood nog gehelp met die inhegtenisneming van drie verdagtes wat met dwelms van sowat R75 000 op Lephalale betrap is.

LEES OOK: Polisiebeamptes help vrou langs pad geboorte skenk

Ledwaba het bygevoeg dat sy na die Roodeplaat-veearts vir ʼn nadoodse ondersoek geneem sal word.

HULDE IS AAN BINA GEBRING

Die provinsiale polisiehoof in Limpopo het hulde gebring aan Bina.

LEES OOK: SA bokskampioen se meisie in Rusland aangehou

“Die honde het die vermoë om by plekke in te gaan waar ʼn gewone lid nie sal kan nie; hulle kan inkriminerende items, of bewysstukke, uitsnuffel deur net hul sintuie te gebruik.

“Hulle is beslis deel van die polisiefamilie. Dit is ʼn groot verlies vir die eenheid en die provinsie,”

sê lt.genl. Thembi Hadebe, polisiehoof in Limpopo.

LEES OOK: Soektog na vermiste 7-jarige van Saldanha