Publiek word gewaarsku om nie misinformasie oor Joslin Smith te deel nie

Die publiek is versoek om nie misleidende inligting oor die vermiste sewejarige kind, Joslin Smith, op sosiale media te deel nie. 

Klein Joslin het verlede week Maandag uit haar gemeenskap van Diazville in Sladanhabaai vermis geraak.

Soekpogings deur ‘n geïntegreerde polisietaakspan, saam met gemeenskapslede en verskeie organisasies gaan hierdie week voort.

Die polisie sê ondersoek na die vermiste Joslin duur voort

Polisiewoordvoerder luitenant-kolonel Malcolm Pojie sê ‘n polisie-ondersoek na die vermiste kind duur voort.

LEES OOK: OVK publiseer 2024 algemene verkiesingsrooster

“Voorlopige inligting onthul dat Joslin op Maandag 19 Februarie 2024 saam met die ma se kêrel by die huis gelos is om na haar om te sien aangesien sy nie goed gevoel het nie. 

Later die middag, toe die ma van die werk af terugkom, was haar dogter nie tuis nie. Sy het uitgevra oor waar die kind was, maar kon haar nie kry nie. 

Sy het later haar kêrel in die hande gekry wat veronderstel was om na die kind om te sien, maar hy kon nie rekenskap gee van waar sy is nie,” het hy gesê. 

Publiek word versoek om nie valse inligting op sosiale media te deel nie

Die Saldanhabaai Plaaslike Munisipaliteit het ‘n beloning van R20 000 aangebied vir enige inligting wat kan lei tot die veilige terugkeer van Smith.

André Truter, burgemeester van Saldanha, het gesê vals inligting wat op sosiale media versprei word, veroorsaak verwarring in die gemeenskap. 

“Fopnuus veroorsaak soveel trauma en verwarring. Ek het met die Saldanhabaai polisiestasiebevelvoerder gepraat, daar is geen waarheid in die inligting dat Joslin gevind is nie. 

Joslin is nie gevind nie. Die soektog en ondersoek duur steeds voort.

Dit is duidelik dat sommige mense dit bloot om selfsugtige redes doen. Jy het geen idee hoeveel skade jy hierdie kind se ma aanrig nie,” het hy gesê. 

Truter het die gemeenskap versoek om alle relevante inligting met die polisie te deel. 

“Ons versoek dat u Joslin in u gebede hou. Ons versoek ook om asseblief te weerhou daarvan om ongeverifieerde inligting te versprei. Indien jy enige inligting ontvang moet jy jou naaste SAPD kontak,” het hy gesê.

Kinderregtegroep Missing Children SA het ook ‘n beroep op die publiek gedoen om staat te maak op amptelike inligting van die polisie oor die jongste oor die soektog na die sewejarige.

Die realiteit van jong kinders wat vermis word, is kommerwekkend, het die organisasie gesê.

“Die werklikheid is skokkend en onmiskenbaar, en ons kan nie meer onskuldige omstanders van hierdie feit wees nie,” het hulle gesê.